محمد الصغير: كوكسال بابا خاف مني.. وأحمد آدم مش بيسأل عليا

حل الفنان محمد الصغير الليلة ضيفًا في برنامج “الترابيزة” الذي تقدمه الإعلامية أميرة بدر ويذاع على شاشة تلفزيون قناة “الشمس”، وأثناء الحلقة كشف محمد الصغير عن سبب قلة ظهوره في الأعمال الفنية ورأيه فيما فعله كوكسال بابا مع المصريين أثناء زيارته لمصر.

تحيا مصر يرصد أبرز تصريحات محمد الصغير في برنامج الترابيزة

وأكد الصغير على أنه لم يعد يشارك في الأعمال الفنية بسبب عدم ترشيحه من النجوم والمنتجين، حيث قال لـ برنامج “الترابيزة”: “أنا بختار الأعمال اللي بتجيني، ثانيًا معادش فيه شغل عشان الإنتاج بعد عني بعد ما غيرت أرقامي فكنت قاعد شوية”.

كما كشف الصغير عن مشاركته في مسرحية جديدة، حيث قال: “ودلوقتي عامل حاجة جميلة جدا للجمهور بتاعي اللي أنا بحبه عامل مسرحية جميلة بعرض فيها مفاجأة اسمها فندق الأحلام وبعرضها على مسرح جلال الشرقاوي ومعايا نادر أبو الليف وإنجي خطاب، ولما مش بيجيلي شغل بتضايق وبناشد المنتجين والدنيا كلها وشركات الإنتاج يا جماعة محمد عيد موجود خلوا بالكم مني”.

رأي محمد الصغير في كوكسال بابا

وعبر الصغير عن استيائه من معاملة كوكسل بابا للمصريين أثناء زيارته لمصر، حيث قال: “اتضايقت لما كوكسال بابا جه مصر لأنه قعد يضرب الناس اللي نازلة له ومعجبة بيه ويقل مننا، وازاي المصريين كانوا واقفين يتضربوا ويضحكوا ويدولوا فلوس”.

وأضاف قائلًا: “كوكسال بابا مشي من مصر عشان مايقابلنيش عشان أنا نزلت أني هنزل أقابله وأشوفه بيتعامل مع الناس ازاي ولو لقيت تعامله غلط هقف للناس دي، ووصلت له المعلومة وتاني يوم كان رايح الأهرامات اعتذر وسافر عشان خاف مني”.

النجوم التي تتواصل مع محمد الصغير

وفي النهاية كشف الصغير عن أسماء النجوم التي تتواصل معه وأيضًا أسماء النجوم التي لم تفعل ذلك، حيث قال لـ برنامج “الترابيزة”: “بتواصل مع الأستاذ أحمد بدير والفنان علاء مرسي وبتواصل مع مجموعة كدا حلوين بتعامل معاهم وبنتكلم مع بعض بس كله بيقولي مفيش حاجة مكتوبالك دلوقتي، وأحمد آدم مش بيسأل عليا وحاولت اتصل عليه كتير مبيردش وعارف أن دا رقمي وأنا اتضايقت منه عشان مردش عليا لأني كنت اكتشافه".