نادية الجندي: فيه فنانات بتسخر لجان إلكترونية عشان تنتقدني.. ودا سر جمالي

كشف النجمة نادية الجندي عن وجود لجان إلكترونية مدفوع لها من قبل فنانات تتعمد الإساءة لها، وانتقاد صورها التي تنشرها عبر حسابها الشخصي على موقع “إنستجرام”.

تحيا مصر يرصد أبرز تصريحات نادية الجندي في برنامج “ET بالعربي”

حيث قالت نادية الجندي في حوار لها ببرنامج “ET بالعربي”: “لما الصور تعمل تريند دا دليل إعجاب، والمنتقدين بيبقوا أداة مأجورة مدفوع ليهم فلوس عشان يحاولوا يشوهوا نجاح أي حد، وبيبقى وراهم أيادي خفية كتير من فنانات وفنانين”.

وتابعت قائلة: “ودا بقى موضة دلوقتي، أي فنانة مش قادرة توصل لنجاح فنانة معينة ومش قادرة توصل لشعبية وجماهيرية نجمة على طول بتسخر جيوش إلكترونية بالفلوس، وبتلاقي أن دي أسهل وسيلة بدل ما هي تشتغل على نفسها، ومش هقول أسامي والجمهور عارف”.

نادية الجندي تتحدث عن ياسمين عبد العزيز

كما أوضحت نادية الجندي أن الفنانة ياسمين عبد العزيز بخير حاليًا، حيث قالت عبر “ET بالعربي”: “ياسمين كويسة الحمد لله بس هي اتعذبت يا حبيبتي عشان عملت 5 عمليات بس إن شاء الله هترجع، وياسمين نجمة محبوبة والجمهور بيحبها جدًا ولها شعبية وجماهيرية كبيرة”.

وعن خلافات ياسمين عبد العزيز الأخيرة مع زوجها أحمد العوضي، قالت الجندي: “كل الناس بتتجوز وبتطلق عادي، بس عشان احنا تحت الميكروسكوب كفنانين بيبقى فيه القال والقيل لكن كل الناس بتتجوز وبتطلق وبيحصل مشاكل في حياتها عادي”.

حياة نادية الجندي الشخصية

كما أكد نادية الجندي على أنها لا تفضل الحديث عن حياتها الشخصية أمام العامة، حيث قالت: “أنا من الناس اللي محبش أشارك مشاكلي الشخصية تبقى حديث الناس، أنا واحدة من الناس طول عمري أحب الناس تتكلم عن أعمالي مش عن حياتي الشخصية”.

وعن سر جمالها ورشاقتها قالت نادية الجندي: “لو الستات عايزين يعرفوا سر جمالي ورشاقتي هيتعبوا خالص، حرمان من كل حاجة، الأكل والنوم بدري مفيش سجاير مفيش كحول وبلعب رياضة، ودا سيستم صعب بالنسبالهم”.

أخر ظهور لنادية الجندي عبر “إنستجرام”

ويذكر أن أخر ظهور للنجمة نادية الجندي عبر حسابها الشخصي على موقع التواصل الاجتماعي “إنستجرام”، حين نشرت صورًا لها من أمام شاطئ البحر أثناء تواجدها في الساحل الشمالي بإطلالة شبابية.