شغال ليل نهار.. زوجة بمحكمة الأسرة بعد 49 زواج: جوزي كل همه الشغل وبيرجع ينام وبس

«زهقت من الحياة الروتينية، كل يوم بيعدى شبه التاني، وأنا فعلا زهقت من الوحدة، أنا عايشة مع جوزي وكأني لوحدي» .. تلك كلمات زوجة يرصدها تحيا مصر لتروي لنا قصتها مع زوجها أثناء تواجدها بمحكمة الأسرة.

تفاصيل القصة

قالت الزوجة البالغة من العمر 65 عاماً:"أنا أتجوزت منذ 49 سنة، وأنجبت طفلين، وأولادى أنجبوا أطفال، وجوزى على المعاش عمره 80 عاماً، وفاتح مكتب كمبيوتر بيشتغل فيه بعد ما خرج على المعاش، وجوزى شخص هادى من البيت للشغل ومن الشغل للبيت، ومن حبه للشغل، فتح مكتب تصوير".

زوجي يستحق التقدير

وتضيف الزوجة: "أنا اتجوزت وأنا عمري 16 سنة، وقضيت مع جوزي كل أيام شبابي وأيام عجزي، وعمرى راح معاه، وفعلا فرحانة أن الأولاد كبروا وأتجوزا، ومفيش حد فيهم كان ناقصة حاجة، ووالدهم كان بيعطيهم كل اللى يحتاجوه وزيادة، بس هو فعلا رجل يستحق أن التقدير".

كل ستات تتمنى زوجي

وتصف الزوجة : "أنا جوزي أى ست تتمناه بس هو بيصحى من الصبح وبيروح الشغل ويرجع ياكل وينام وكل يوم بيحصل كده، وبجد الأيام أصبحت زي بعض، أنا كل الأيام بتعدى عليه وكأنى حاسها نفس اليوم، بصحى أنظف وأطبخ وأعمل أكل وأجهز لجوزي الأكل وبعد كده أنام عادى، واليوم الثاني بيشبه اليوم اللي قبله بالظبط روتين وشغال علطول".

الحياة روتينة مع جوزي وأنا مليت

وتعبر الزوجة وتقول: "أنا زهقت من ده، كل يوم نفس اليوم، كل يوم بيروح الشغل يشتغل 12 ساعة ويرجع يأكل وينام وأنا اجهز الأكل وينام وخلاص انتهى اليوم على كده، ولما اتكلمت معها عن مشكلة الملل ده، وأن الحياة أصبحت روتينية، رد عليا وقال أنا بشتغل 12 ساعة ومعنديش وقت أحل المشكلة دى خالص وبرجع تعبان وعاوز أنام".

طلبت الطلاق ورفض

وتسترسل الزوجة: "أنا قولت لما أطلب منه الطلاق هيتخانق معايا وهتبدأ الحياة تتغير وهيحاول يصالحني ونغير المود الزهق ده، بس اتصدمت من رد فعل جوزي، راح نام ولا كأنه سمع أنا كلمته  في أيه، ولم أحضر الفطار تاني اليوم، معترضش ولا قال كلمة".

دعوى خلع

وتختتم الزوجة: "أنا روحت قعدت مع بنتى الكبيرة، وهو ولا سأل، وطلبت منه الطلاق فرفض، وصحبتي قالتلي إنك لو خلعتي جوزك هيرجع ويعملك اللى إنتى عاوزاها، ومن هنا اتصلت بالمحامي ورفع دعوى خلع والأبناء قالوا لوالدهم، وهو لم يحضر ولا جلسه وتم الخلع وأنا فعلا عرفت إنى ماليش في حياته أى لازمة وإنى كنت أزمة في حياته والعمر ده كله راح عالفاضي مع جوزي".