مؤجل «مش عايز يصرف على أولاده»..صفية في دعوى خلع أمام محكمة الأسرة المطرية

«مش عايز يصرف على أولاده».. بهذة الكلمات رفعت سيدة تدعى «صفية» 45 سنة، دعوى خلع ضد زوجها «سامح» 65 سنة، أمام محكمة الأسرة المطرية.

تحيا مصر يرصد في السطور التالية حكاية ربة منزل داخل محكمة الأسرة بالمطرية

متجوزة بقالي 24 سنة

روت الزوجة لـمراسلة «تحيا مصر»: «متجوزة بقالي 24 سنة،جواز صالونات، زوجي اكبر مني20 سنة، وعندي 3 أولاد، كان مصروفي كل يوم 20 جنية، زوجي موظف وبيقبض فلوس كتير، ومعاه عربية، ولادي لما كبروا وبقوا عايزين يتجوزوا طردني أنا وعيالي برة البيت، وقالي أصرفي أنتي عليهم مليش دعوة، وقالي: « اللي عايز يتجوزهم يخدوهم كدة من غير جهاز أنا مش هصرف حاجة دول مش عيالي، وقالي هخليكي متعلقة كدة ومفيش طلاق».

بشحت عشان أكل أولادي

وأشارت الزوجة في دعواها أمام محكمة الأسرة:«طردني في الشارع بقيت بسرح أشحت أنا وعيالي وبقيت أشتغل في البيوت وأصرف عليهم عشان يكملوا تعليمهم وأجوزهم، لحد لما لاقيت شغل كويس وجوزت عيالي من شغلي في البيوت، ولسه عايزه أخد حقي منه وحق أولادي، ومش عارفة عشان هو معاه فلوس كتير، وبيقدر يعمل أي حاجة، أنا تعبت، أبني كان في ثانوية العامة العام ده، وجاب مجموع حلو اوي وعايز يدخل تجارة أنجليزي وأنا خلاص مش قادرة أصرف عليه تاني، راح عشان يطلب فلوس من أبوه، طرده وقالو أنت ولا أبني ولا أعرفك»أنا عايزة اخد حقي منه ومش عارفة وعماله أجري على المحاكم كل يوم».

وأختمت الزوجة لـ «تحيا مصر»: «لجأت الي محكمة الأسرة لرفع دعوى خلع ضده داخل محكمة المطرية».