«السيسي» محذرا المصريين من «السحر»: متخلوش حد أبدا يخدعكم

حذر الرئيس عبد الفتاح السيسي، جموع الشعب المصري من الإنصياع وراء الأقاويل والآراء المخادعة، خلال افتتاح عدد من المشروعات التنموية بالسويس وجنوب سيناء اليوم الثلاثاء، وذلك فى إطار توجهات الدولة نحو افتتاح عدد من المشاريع الفترة المقبلة.

وقال السيسي: «توقفنا خلال الفترة اللى فاتت عن الافتتاحات وبقول أنا مستعد يوم بعد يوم لمدة شهر أو اثنين أو ثلاثة نفضل نفتتح اللى عملناه علشان نوريه للمصريين مش احنا اللى عملناه ده احنا كلنا كدولة ومصريين اللى عملت علشان تغير حياة المصريين وبقول الكلام ده وبكرره علشان محتاجين نتكلم كتير ونكرر الكلام كتير والإعلام يتحدث كتير علشان يقول للناس يا مصريين متخلوش حد أبدا يخدعكم، مستشهدا بالآية الكريمة «فسحروا أعين الناس».. «سورة الأعراف».

وتابع الرئيس السيسي قائلا: «يعنى إيه سحروا أعين الناس؟، يعنى خدعوهم بيضحكوا عليهم ويشوهوا الحكاية، وده أمر احنا مسؤولين مع بعض كلنا الدولة بمؤسساتها وإعلامها إنها تبقى الحامى المدافع عن وعى المصريين علشان أنا ملاحظ إن بقالنا شهور يحاولوا كل يوم ألف وألفين يعنى شائعة وتكذيب وتحريف وإفك فالناس معذورة برضه والناس بسيطة ومشغولة فى أكل عيشها وفى حياتها اليومية ومش هيقعد يدقق فى كل اللى احنا بنتكلم عليه ده، محتاجين إن إحنا نكرره ونتكلم فيه، وكل مسؤول بيفتتح مؤتمر لازم يعدى على حتة الوعى ويتكلم فيها، هل الناس هتزهق ؟..لأ مش هتزهق، الناس عاوزة تبقى دايما مطمنة وتعرف».