نص تحقيقات المتهم الثالث في حادثة معدية أبو غالب

زعم المتهم الثالث بقضية حادث معدية أبو غالب، أنه غائبًا من العمل يوم واقعة غرق 16 فتاة وسيدة وإصابة 2 أخريات، من أجل الذهاب لتأدية الامتحانات حيث أنه يدرس في التعليم الفني التجاري.

تأجيل محاكمة المتهمين في حادث معدية أبو غالب

منها تعويض مدني مؤقت.. طلبات دفاع ضحايا معدية أبو غالب

أقوال المتهم الثالث في معدية أبوغالب

وجاءت أقوال “معاذ” المتهم الثالث بقضية حادث معدية أبو غالب التي راح ضحيتها 16 فتاة، - سائق معدية- أمام النيابة العامة.

وقال سائق معدية أبوغالب، في التحقيقات، إن الحادث «قضاء وقدر»، مشيرًا إلى عدم حمله لأية تراخيص لقيادة المعدية التي يستأجرها ابن عمومته.

وإلى نص التحقيقات:

س: ما قولك فيما هو منسوب إليك من إنك متهم بالتسبب خطأً في وفاه المجني عليهن: أميرة حمدي صابر مختار، وآلاء عبدالمجيد عامر عطية، وزينب أحمد لطفي عبداللطيف، وفهد محمد عبدالتواب السيد، وروضة هشام عبدالنبي على، وجنا عبدالله محمد أحمد، وملك عادل صقر حسن، ويسرا مجدي عبدالغني، وروان رمضان عيد محروس، وتهاني السيد عمر سليمان، وجنى إيهاب جمعة عبدالباسط وكان ذلك ناشئًا عن إهمالك وعدم احترازك وعدم مراعاتك القوانين واللوائح على النحو المبين بالتحقيقات؟

ج: محصلش.

س: ما قولك فيما هو منسوب إليك من إنك متهم بالتسبب خطأً في إصابه المجني عليهن: توبة أحمد لطفي، وحبيية دياب حسن وكان ذلك ناشئًا عن إهمالك وعدم احترازك وعدم مراعتك القوانين واللوائح فأحدثت بهم الإصابات الواردة بالتقرير الطبي المرفق، وذلك على النحو المبين بالتحقيقات؟

ج: محصلش
 

س: ما قولك فيما هو منسوب إليك من أنك متهم باستعمال مركب في التعدية الخاصة في نقل الركاب من شاطئ إلى آخر قبل الحصول على ترخيص على النحو المبين بالتحقيقات؟

ج: محصلش.

س: ما قولك فيما هو منسوب إليك من أنك متهم بقيادة وحدة آلية دون ترخيص من الجهة المختصة على النحو المبين بالتحقيقات؟

ج: محصلش.

س: ما قولك فيما هو منسوب إليك من أنك متهم بنقل الركاب قبل الحصول على ترخيص من الهيئة العامة لشؤون النقل المالي الداخلي على النحو المبين بالتحقيقات؟

ج: محصلش.

س: ما قولك فيما هو منسوب إليك من أنك متهم بقيادة مركب في الملاحة الداخلية دون توافر شروط السلامة على النحو المبين بالتحقيقات؟

ج محصلش.

س: ما هي حالتك الاجتماعية؟

ج: أنا في دبلوم تجارة.

س: وأين تحديدًا تقيم ومع من؟

ج: أنا أقيم عند طريق السكة الحديد- أبوغالب- منشأة القناطر- الجيزة، مع أهلي.

س: ما هي طبيعة عملك تحديدًا؟

ج: أنا مش شغال أنا لسة طالب وبادرس، وكنت بشتغل على المعدية بس سبت الشغل بقالي كام يوم علشان عندي امتحانات.

س: ومنذ متى وأنت تباشر ذلك الاختصاص؟

ج: أنا بقالي حوالي 5 سنين باشتغل عليها، بس أنا سايب الشغل بقالي كان يوم.

س: ومن تحديدًا شخص القائم بتعيينك عاملًا بتلك العبارة؟

ج: الحاج ربيع السيد أحمد هو اللي كان مشغلني قبل ما أسيب الشغل.

س: وما المقابل المادي الذي كنت تتقاضاة نظير عملك بتلك العبارة؟

ج: يوميتي كانت ٢٥٠ جنيهًا.

س: ألازلت تعمل سائقًا بتلك العبارة؟

ج: لا أنا سايب الشغل فيها بقالي كام يوم.

س: ولم؟

ج: عشان أنا طالب وبامتحن اليومين دول فسيبت الشغل فيه علشان أتفرغ لمذاكرتي.

س: هل من ثمة علاقة فيما بينك وبين كل: مصطفي مشحوت سيد مصطفى (سائق المعدية)- وربيع السيد أحمد خفاجى (مالكها)؟

ج: (ربيع) يبقى ابن عمي، ومصطفى أعرفه عشان ساكن جنبي، بس أنا مفيش علاقه بينه وبيني.

س: هل من ثمة خلافات فيما بينك وبين سالفي الذكر؟

ج: لا خالص.

س: ما صلتك تحديدًا بالعبارة محل الواقعة؟

ج: أنا كنت شغال فيها من فترة بس سيبت الشغل فيها من كام يوم زي ما قولت.

س: ومتى تحديدًا آخر مرة باشرت عملك كأحد أفراد طاقم تلك العبارة تحديدًا؟

ج: أنا بقالي فترة مش بروح حوالي يومين تلاته.

س: هل باشرت عملك كأحد أفراد طاقم تلك العبارة بالوردية الليلة بتاريخ 20- 5- 2024؟

ج: لا أنا بقالي 3 أيام مش بروح اشتغل عشان عندي امتحانات.

س: وما قولك فيما ثبت بأقوالك استدلالًا بمحضر جمع الاستدلالات بأنك قمت بتسليم الوردية الليلة للمتهم مصطفى مشحوت سيد بتاريخ الواقعة؟

ج: الكلام ده محصلش، أنا مقلتش كده أنا مشتغلتش على المعدية بقالي كام يوم عشان عندي امتحانات.

س: وما تعليلك إذًا بما أثبت بمحضر جمع الاستدلالات؟

ج: أنا مقولتش كدة، أنا قلت لتهم في المركز إني مروحتش بالليل وبقالي كام يوم مروحتش عشان عندي امتحانات فمعرفش جابوا الكلام ده منين.

س: ومن تحديدًا شخص مالك العبارة؟

ج: هي العبارة أصلاً ملك حي منشأة القناطر بس متأجرة.

س: من تحديدًا شخص مستأجر تلك العبارة؟

ج: ابني عمي الحاج ربيع السيد أحمد خفاجى.

س: منذ متى وسالف الذكر مستأجر تلك العبارة؟

ج: لا مش عارف بصراحة.
س: هل من ثمة عقود إيجارية مبرمة بشأن تأجيرها؟

ج: معرفش.

س: وهل استصدر لك سالف الذكر ثمة تراخيص من الجهات المختصة كي تعمل سائقًا بها؟

ج: معرفش.

س: صف لنا تحديدًا مواصفات تلك العبارة؟

ج: هي معدية مصنوعة من الحديد طولها حوالي 25 مترًا وعرضها حوالي 10 أمتار ومحاطة من الجنبين بسور حديد من كل جهة وفيها في النص وحدة تحكم بس مش شغالة، وفيها عدد 2 موتور واحد للرايح وواحد للراجع، وفيها من قدام ومن ورا وحسة (الحديدة اللي في أول المعدية وآخرها) وفيها واير من قدام وواير (سلك) من ورا وفيها صدادات من الجنبين اليمين والشمال للوجهة اللي قدام والوجهة اللي ورا.

س: ما صلتك تحديدًا بالعبارة محل الواقعة؟

ج: أنا كنت شغال فيها من فترة بس سيبت الشغل فيها من كام يوم زي ما قولت.

والد الطفلة يسرا ضحية حادث «معدية أبو غالب» خلال حديثه لـ«المصري اليوم» - صورة أرشيفية

ميكروباص معدية أبو غالب - صورة أرشيفية
ج: لا أنا كنت بشتغل من غير عقود.

س: ولم؟

ج: علشان ده الطبيعي بينا، وإحنا بنشتغل سواقين وعمال على المعدية من غير عقود، هو بيتفق معانا إننا نشتغل على المعدية فنشتغل باليومية.

س: وما مضمون الاتفاق الذي تم بينك وبين المدعو ربيع السيد أحمد تحديدًا؟

ج: هو كان متفق معايا اشتغل على المعدية، أنا وباقي العمال باليومية مقابل 250 جنيهًا في اليوم.

س: وما هي المهام التي كانت مسندة لكل منكم تحديدًا؟

ج: إحنا الطبيعي بتكون أربعة أو خمسة في الوردية، يبقى كل واحد فينا مسؤول عن حاجة في المعدية، بيكون واحد مسؤول عن إنه يشغل الماتور واثنين بيكونوا مسؤولين عن (الواير) بتاع المعدية، وواحد بيلم الأجرة وواحد بينظم ترتيب العربيات في المعدية.

س: وهل أيًا من العاملين بتلك العبارة مؤهل للقيام بتلك الأعمال؟

ج: أيوة.

س: وكيف ذلك؟

ج: علشان كلنا بقالنا سنين شغالين فيها، فخلاص أخدنا على الشغلانة.

س: وما هي خبراتك ومؤهلاتك للعمل سائقًا لتلك العبارة؟

ج: خبرتي خدتها من الشغل فيها أيام ما كنت باشتغل.

س: هل قمت باستصدار ثمه تراخيص تبيح لك العمل سائقًا بتلك العبارة؟

ج: لا.

س: وما الذي حال دون ذلك؟

ج: معرفش إن في رخصة بتطلع، وأنا سيبت الشغل أصلاً.

س: هل قام سالف الذكر بتدريبك للقيام بتلك الأعمال؟

ج: لا.

س: وهل استصدر لك سالف الذكر تراخيص من الجهات المختصة كي تعمل سائقاً بها؟

ج: لا.

س وما الذي حال دون ذلك؟

ج: معرفش.

س: صف لنا تحديدًا شروط السلامة والأمان المفترض تواجدها بتلك العبارة؟

ج: المفروض إن العبارة بيكون الوش اللي من قدام ومن ورا بتقفل وتفتح أوتوماتيك علشان تحمي العربيات، وهي على المعدية وكمان بيكون فيه عوامات ولايف جاكيت في جنبين المعدية.

س: وما مدى توافر تلك الاشتراطات بالعبارة محل الواقعة؟

ج: الوحمة (الحديدتين المتواجدتين ببداية ونهايه العبارة )، مش شغالة بس العوامات موجودة.

س: وما سبب تعطل القطعتين الحديدتين المتواجدتين ببداية ونهايه العبارة (الوحمة) محل الواقعة؟

ج: أنا معرفش بس هما مكانوش شغالين، لما كنت شغال في المعدية.

س: إذًا وكيف كنت تبحر دون غلق القطعتين الحديدتين المتواجدين ببداية ونهاية العبارة محل الواقعة؟

ج: هي مبتشغلش من زمان فمش بنرفعها وبتمشي وهي كده بس بنحط مكانها واير.

س: وهل ذلك الحبل الحديد (الواير) كافي لحماية العبارة وما عليها من مركبات دون سقوطها في حالة حدوث أي طارئ؟

ج: هي بتمشي كده على طول وربنا بيستر.

س: وهل تقف عما اذا كانت العبارة مستوفاه لشروط السلامة والأمان السابق ذكرها؟

ج: لا.

س: ولماذا لم تقم بإبلاغ مالكها بذلك الشأن؟

ج: أنا مكنش ليا دعوة بموضوع التراخيص والحاجات دي.

س: أتخضع تلك العبارة الأعمال صيانه بصفة دورية؟

ج: لا، بس لما حاجة بتبوظ فيها بنصلحها.

س: إذا وما الأعطال المعتاد حدوثها بتلك العبارة؟

ج: أنا الأيام اللي كنت بتشغل فيها مكنش بيحصل فيها أعطال، ساعات بس الموتور بيكون عايز يتصين.

س: ومن شخص القائم بإصلاح تلك الأعطال؟

ج: أي صنايعي بيجي يصلحها.

س: ألم يكن هناك مهندس فني معين لإصلاح تلك الأعطال؟

ج: لا.

س: وما الذي حال دون ذلك؟

ج: علشان هي معدية بلدي وبتتصين على إيد صنايعية عاديين وده اللي إحنا واخدين عليه.

س: وما هي الصيانات المطلوبة تحديدًا لصيانة تلك النقالة؟

ج: معرفش.

س: صف لنا بصفة عامة الكيفية التي كنت تقوم بالإبحار بها بتلك العبارة؟

ج: المفترض إن العربيات والموتوسكيلات بتطلع على العبارة وبيبقى في عامل بيركن العربيات والموتوسيكلات على العبارة علشان يبقوا راكنين بشكل منظم، وكمان بيبقى فيه أهالي بيركبوا المعدية وبيكونوا واقفين على رجلهم، وأول ما المعدية ما بتكمل 14عربية بيقوم عامل الموتور بيدور الموتور، وعامل ثالت بيشيل الواير اللي على أول المعدية وآخرها وبعد كدة المعدية بتتحرك في الاتجاه المقابل.

س: وما السرعة المعتاد سير العبارة عليها تحديدًا؟

ج: سرعه خفيفة خالص.

س: ومن تحديدًا الأشخاص المحدد لهم استقلال تلك العبارة؟

ج: مفيش حد معين، هي المعدية بتقف على البر، وأول ما يتحمل العربيات والأهالي بتتحرك على الناحية الثانية.

س: هل تتقاضي ثمة رسوم من راكبيها؟

ج: أيوة.

س: وكم يبلغ رسم المركبة الواحدة؟

ج: بناخد من العربية خمسة جنيهات، ومن الموتوسكيل جنيه واحد والميكروباص 15 جنيهًا.

س: هل تتقاضي ثمة رسوم من أيًا من الأهالي مستقلي تلك العبارة نظير نقلهم للبر الآخر؟

ج: لا، إحنا بناخد رسوم من العربيات بس، ومينخدش من الأهالي.

س: وكم عدد السيارات المعتاد تواجدها أعلى العبارة حال إبحارها؟

ج: 14 عربية.

س: وعلى أي أساس تم تحديد تلك السعة؟

ج: علشان العبارة ميتاخدش مكان لأكثر من 14 عربية.

س: وكم عدد مرات إبحارك بتلك العبارة في الوردية الواحدة؟

ج: مش فاكر أنا بقالي فترة مبروحش الشغل وساييه.

س: ومن أين البحر وإلی أین تتوجه تحديدًا؟

ج: من البر الغربي لأبوغالب للبر الشرقي والعكس.

س: وهل من ثمة طرق أخرى يمكن سلكها لعبور مياه نهر النيل والوصول للبر الآخر؟

ج: آه في طريق ثاني ممكن العربيات تعديه منه النيل للناحية الثانية، بس يبقى أطول بكثير فعلشان كده العربيات بتعدي بالمعدية.

س: وما إجراءات السلامة والأمان التي كنت تتخلها تحديدًا قبل إبحارك للبر الآخر؟

ج: أنا قبل ما بطلع بتأكد إن الموتور شغال تمام.

س: هل كنت تقم قبل إبحارك بإغلاق القطعة الحديدة المتواجدة بداية ونهاية العبارة- الوحسة- من الناحيتين؟

ج: لا.

س: وما الذي حال دون ذلك؟

ج: علشان الاثنين مش شغالين زي ماقولت.

س: وما الذي حال دون إبلاغك لمستأجر العبارة بذلك العطل وتكليفه بإصلاحه؟

ج: عشان أنا الحاجات دي مش اختصاصي.

س: وما المدة الزمنية المستغرقه لوصولك للبر الآخر؟

ج: حوالي خمس دقايق.

س وكم تبعد نقطه ابحار تلك العبارة عن نقطه رسوها تحديدًا؟

ج: حوالي 100 متر.

س: إذا صف لنا كيفية وقوع الحادث محل التحقيق؟

ج: أنا مشوفتش الواقعة، ومعرفش حصلت إزاي.

يوم حادث غرق ميكروباص معدية أبو غالب

س: إذا وكيف نما علمك بالواقعة محل التحقيق تحديدًا؟

ج: أنا كل اللي حصل إني كنت في بيتي ونازل رايح امتحان كان عندي النهاردة في وردان، وجيت أعدي من المعدية لقيت الأهالي متجمعين، وفي صريخ مكنتش فاهم في إيه لقيت الناس بتقول لي إن كان في ميكروباص كان محمل بنات وقعوا في الميه، والأهالي كانت بتحاول تنقذ البنات اللي كانت راكبة الميكروباص فأنا على طول جريت ونطيت في الميه عشان أحاول أطلعهم وبالفعل أنا والأهالي قدرنا نطلع عدد من البنات بره كان في منهم عايشين، وفي منهم كانوا متوفين ولقيت المباحث والحكومة جت سألوا مين صاحب المعدية ساعة ما الواقعة ما حصلت فمصطفى مشحوت قال لهم أنا اللي كنتب شغال ولقيتهم أخدوه وأخدوني معاه فقلتلهم أنا مليش دعوة بالواقعة، أنا سايب الشغل بقالي كام يوم وأنا كنت في بيتي الصبح ونزلت بعد ما الواقعة حصلت لقيتهم بيقولي طب تعالى معانا على المركز هناخد منك الكلمتين دول ونمشيك ولقيت نفسي جيت النيابة دلوقتي.

س: وما سبب ومناسبة تواجدك بالمكان والزمان آنفي البيان؟

ج: أنا كنت نازل ورايح امتحاني فلقيت ناس كثير متجمعين وأهالي كتير بتصرخ.

س: وما الذي أبصرته تحديدًا في الزمان والمكان آنفي البيان؟

ج: لقيت الاهالي متجمعين وفي صريخ مكنتش فاهم في ايه لقيت الناس بتقولي إن كان في ميكروباص كان محمل بنات ووقع في المياه، والأهالي كنت بتحاول تنقذ البنات اللي كانت راكبة الميكروباص فأنا على طول جريت ونطيت في المياه عشان أحاول أطلعهم.

س: هل أبصرت واقعة سقوط المركبة (ميكروباص) محل استقلال المتوفين والمصابين؟

ج: لا أنا لما نزلت من بيتي ورايح أركب المعدية لقيت الأهالي بتصرخ والناس ملمومة والميكروباص في النيل وقع بالبنات.

س: صف لنا كيفية سقوط المركبة (الميكروباص) من أعلى العبارة وقتئذ؟

ج: أنا مشفتش حاجة أنا نزلت ولقيت الناس بتصرخ، وأنا سمعت من الناس اللي كانت هناك أن السواق بتاعه سابه ونزل منه ومشدش فرامل اليد فالميكروباص أتحرك.

س: هل من ثمة شخص تسبب عمدًا يإهمال في سقوط المركبه آنفة البيان؟

ج: أنا معرفش.

س: ومن شخص المسؤول عن استخدام مكابح اليد الخاصة بالمركبة آنفة البيان؟

ج: أكيد السواق اللي اسمه محمد خالد عبدالجواد.

س: هل من ثمة شخص آخر أو مركبات أخرى سقطت في المياه بلك الأحيان؟

ج: لا الميكروباص بس الوقع.

س: ألم تحاول إنقاذ أيًا من الإناث مستقلي المركبة؟

ج: أيوة.

س: وكيف كان ذلك ذلك؟

ج نطيت في النيل وحاولت اطلعهم.

س: هل أفلحت محاولة إنقاذك المستقلي تلك المركبة؟

ج: أيوة أنا انقذت اللي اقدر عليه وطلعنا أنا والأهالي حوالي 3 بنات عايشين وساعدت الأهالي في أن هما يطلعوا الجثث.

س: أتقف على هوية ايا من الناجين أو المتوفيين إلى رحمه مولاهم؟

ج: لا

س: صف لنا تحديداً كيفيه التشال جثامين المتوفيين إلى رحمه مولاهم وكذا انقاذ الناجين من مستقلي المركبة محل الواقعة؟

ج: الأهالي وأنا وكل الناس نطت في الميه وطلعنا اللي قدرنا نطلعه.

س: وما التصرف الذي بدر من باقي مستقلي المركبات المتواجدة أعلى العبارة بتلك الأحيان؟

ج: العربيات كلها خرجت من المعدية.

س: وما سبب وفاة كلا من إلى رحمة مولاهم: أميرة حمدي صابر مختار، الاء عبدالمجيد عامر عطيه، وزينب أحمد لطفي عبداللطيف، وشهد محمد عبدالتواب السيد، وروضة هشام عبدالنبي على، وجنا عبدالله محمد أحمد، وملك عادل صقر حسن، ويسرا مجدي عبدالغني، وروان رمضان عيد محروس، وتهاني السيد عمر سليمان، وجنى إيهاب جمعو عبدالباسط؟

ج: اللي سمعته إنهم ماتوا من الغرق لما الميكروباص اللي كانوا فيه وقع في النيل.

س امن لمه خلافات فيما بينك وبين ايا من سالفي الذكر؟

ج: لا انا معر فهمش.

س: وما هي السبب الرئيسي اذا لسقوط المركبة (ميكروباص) محل استقلال المتوفين إلى رحمه مولاهم وكذا الناجين؟

ج: أنا معرفش بس سمعت من الناس اللي كانت هناك إن السواق بتاعه سابه ونزل منه ومشدش فرامل اليد فالميكرباص اترج ووقع في المياه.

س: هل من ثمة شبهه جنائية في وفاة وإصابة مستقلي المركبة آنفة البيان؟

ج: لا اللي عرفته إن الحادثة حصلت قضاء وقدر.

س: اذا وما هي ظروف عرضك علينا؟

ج: لما روحت اطلع الناس اللي وقعوا في المياه والحكومة جت سألوا مين صاحب المعدية ساعة ما الواقعة ما حصلت فمصطفى مشحوت قالهم انا اللي كنت شغال ولقيتهم اخدوه واخدوني معاه فقلتلهم انا مليش دعوة بالواقعة انا سايب الشغل بقالي كام يوم وانا كنت في بيتي الصبح ونزلت بعدما الواقعة ما حصلت لقيتهم طب تعالى معانا على المركز هناخد منك الكلمتين دول وتمشيك ولقيت نفسي جيت النيابة دلوقتي.

س: متي وأين حدث ذلك؟

ج: الكلام ده حصل انهادره 21-5-2024 حوالي الساعة 7:30 صباحاً عند معدية ابو غالب بجانب السكة
الحديد منشأة القناطر
س: ما هي بادرة لقائك بالقائمين على ضبطك؟
ج: هما أول ما الحادثة حصلت الحكومة جات وقالولي مين اللي كان سابق المعدية فمصطفى مشحوت قالهم انه هو اللي كان سابق لقيتهم اخذوه واخدوني انا كمان.

س: هل من ثمة تفتيش الصرف لشخصك ؟
ج: لا.
س: ما قولك فيا ثبت بمحضر جمع الاستدلالات المؤرخ في تاريخ 21-5-2024؟

ج: أنا كل اللي عرفته عن الموضوع وشوفته قولت عليه.

س: ما صلتك تحديدا بالمتهم مصطفی مشحوت سید؟

ج مصطفى أنا أعرفه عشان هو كان بيشتغل ساعات معايا على المعدية قبل ما اسيب الشغل

س: وهل لسالف الذكر ثمة دور في ادارة أو تشغيل أو قيادة العبارة محل الواقعة؟

ج أيوة هو اللي بيشتغل عليها فعلاً.

س: أنت متهم بالتسبب خطاً في وفاه المجني عليهن: أميرة حمدي صابر مختار، آلاء عبدالمجيد عامر عطيه، زينب، ملك أحمد لطفي عبداللطيف :، شهد محمد عبدالتواب السيد، روضه هشام عبدالنبي على، جنا عبدالله محمد أحمد. عادل صفر حسن، يسرا مجدي عبدالغني، روان رمضان عيد محرم تهاني السيد عمر سليمان، جنى ايهاب جمعه عبدالباسط وكان ذلك ناشئاً عن إهمالك وعدم احترازك وعدم مراعتك القوانين واللوائح على النحو المبين بالتحقيقات؟

ج: محصلش.

س: أنت متهم بالتسبب خطا في إصابه المجني عليهم: توبة أحمد لطفي، وحبيبة دياب حسن وكان ذلك ناشئاً عن إهمالك وعدم احترازك وعدم مراعتك القوانين واللوائح فأحدثت بهم الإصابات الواردة بالتقرير الطبي المرفق وذلك على النحو المبين بالتحقيقات؟

ج: محصلش.

س: أنت متهم باستعمال مركب في التعدية الخاصة في نقل الركاب من شاطئ إلى آخر قبل الحصول على ترخيص على النحو المبين بالتحقيقات؟

ج محصلش.

س: أنت متهم بقيادة وحدة آلية بدون ترخيص من الجهة المختصة على النحو المبين بالتحقيقات؟

ج: محصلش.

س: أنت متهم بنقل الركاب قبل الحصول على ترخيص من الهيئة العامة لشئون النقل المائي الداخلي على النحو المبين بالتحقيقات؟

ج: محصلش.

س: أنت متهم بقيادة مركب في الملاحة الداخلية بدون توافر شروط السلامة على النحو المبين بالتحقيقات؟

ج محصلش.

س: هل لديك اقوال أخرى؟

ج: لا.

جلسة محاكمة المتهمين في حادث معدية أبو غالب

ومن المقرر أن تصدر محكمة جنح مركز إمبابة وكرداسة في الجيزة، اليوم الإثنين، حكمها في القضية المعروفة إعلاميًا بـ«ميكروباص معدية أبوغالب» المتهم بها سائق سيارة أجرة، وعاملا معدية، ومستأجرها، ورئيس مركز ومدينة منشأة القناطر.