عباس أبو الحسن عن كثرة وفيات الوسط الفني: مصدوم

علق الفنان عباس أبو الحسن عن كثرة وفيات الوسط الفني في الفترة الأخيرة، وذلك بعد رحيل الفنان مصطفى فهمي في الساعات الماضية من فجر اليوم الأربعاء الموافق 30 من شهر أكتوبر الجاري.

عباس أبو الحسن: ناس كتير ماتوا من الوسط الفني ومحصلوش نص متوسط الحياة 

وكتب عباس أبو الحسن في منشور رصده موقع تحيا مصر عبر حسابه الرسمي بموقع التواصل الاجتماعي فيسبوك: كنت برجع في الصفحة بتاعتي بدور على پوست معين كتبته من كذا سنة، اتصدمت لما شفت كم الناس اللي ماتت من الأصحاب الأعزة، والشخصيات العامة، والقامات الفنية . منهم كتير ماتوا ومحصلوش نص متوسط الحياة المفترض ، واعتراني إحساسين وفكرتين متناقضين ؛ إزاي إن جميعنا في طابور واحد نقترب من حافة القبور، وان القدر ممكن، ولأسباب غامضة، يدفع بك في لحظة إلى أول الطابور.

عباس أبو الحسن: كتير ماتو وهما نايمين وفي الشغل 

وتابع عباس أبو الحسن: مش لازم تكون مريض بمرض عضّال أو في حادثة، كتير ماتوا وهمه نايمين، وهمه في الشغل، عندي صديق عزيز مات وهو في الچيم وصديق عزيز آخر مات وهو في الجو على طيارة هو الكابتن بتاعها، الاحساس الأول انك لازم تحاول تعيش متسق مع ذاتك، ودة يتطلب انك تعرف نفسك معرفة حقيقية، تستمع بعلاقات حقيقية دافئة مع ناس بتحبهم وبيحبوك، تعيش بشرف وانك تدرك إن الشخص الوحيد في الكون اللي يفرق معاك هو شايفك ازاي هو إنت، وانك تعيش من اجل غرض ما الأفضل انه يكون غرض نبيل، ان مافيش حد مشي في رحاب القطيع وكان متحقق وراضي وفي سلام مع نفسه، ان الحياة فعلا قصيرة وعبثية، ان الحياة لا تقاس بالنجاح والا مكانش فيه مشاهير وعظماء وأساطير انتحروا دون سابق انذار.

عباس أبو الحسن يقدم نصيحة للجمهور بعد وفيات الوسط الفني 

واستكمل عباس أبو الحسن حديثه: الحياة في الحقيقة تُقاس بعدد التجارب الحياتية اللي انت عشتها بشغف وبكلك. الحاجة التانية؛ انك تدرك ان الفناء قادم لا محالة وبدون انذار، وان الكفن مالوش جيوب ، وان فجأة وانا أعني فجاة، هتصحى يوم تكتشف فيه ان الحياة مبقتش قدامك.

مهرجان القاهرة ينعي مصطفى فهمي: ترك أثراً كبيرًا فى قلوبنا

إليكم موعد ومكان جنازة الفنان مصطفى فهمي

واختتم عباس أبو الحسن: الحياة وراك، وإن اهم حاجة في الإدراك دة، ان لما يحصل دة، متحسش بالذعر، لانك فعلا عشت مش انك أخدت خازوق متغري بكل احلامك المجهضة، انك عملت حجات كويسة اكتر ما عملت حجات وحشة ، وانك حبيت واتحبيت، ومسيبتش العالم أبشع من لما جيت فيه، واخيراً انك تسامح نفسك وتطببط على روحك مش تجلدها ، وانك تقول لنفسك : أن أي حاجة عملتها كانت مدفوعة بإدراكي وفهمي ومخاوفي وقتها.