حمزة نمرة: معنديش مانع أغني مع مطرب مهرجانات.. وهذا سبب عدم دخولي مجال التمثيل

تحدث المطرب حمزة نمرة عن رأيه في مطرب المهرجانات واغاني المهرجانات وذلك خلال حلقة خاصة له مع قناة الحياة، كما كشف عن إمكانية تعاونه مع مطرب مهرجانات ودخوله مجال النمثيل، مشيرا إلى أنه ليس من تصنيف الفن بهابط وناجح.

حمزة نمرة: معنديش مشكلة أتعاون مع مطرب مهرجانات وبحب حودة بندق 

وقال حمزة نمرة في تصريحات رصدها موقع تحيا مصر: لا أؤمن بتنصيف الفن لهابط وغير هابط، وفيه أذواق، وفي الآخر بقول الأغنية عجباني أو وحشة بالنسبالي، مش معنى كده أنها لا تستحق طالما الكلام غير مسف، غير كده أي أغنية بأي طريقة بأي استايل من أول المهرجانات لحد الأوركسترا من حقها تطلع للجمهور.

وأضاف: معنديش مشكلة أتعاون مطرب مهرجانات لو فيه سياق ينفعنا إحنا الاتنين، وبعضهم بيعجبني ومنهم حودة بندق ومسلم وفنانين كتير، بجانب حبي للأغاني الشعبي وبحب طارق الشيخ، ومعنديش مشكلة في اللون طالما الكلام مقبول وله معنى حلو ومفيش مشكلة في القالب الفني.

حمزة نمرة يكشف سبب عدم دخوله مجال التمثيل 

وكشف حمزة نمرة أيضا عن إمكانية دخوله مجال التمثيل، قائلا: أنا حاطط قدامي أحمد زكي ونور الشريف ومحمود عبد العزيز وغيرهم ودول ناس محترفين تمثيل وبيبينوا لك أن التمثيل صنعة، وأنا أتكسف إني أفكر أمثل في حضرة ناس عظماء زيهم، ولو عاوز أمثل المفروض أدرس وتبقى صنعتي وأركز فيها، لكن أنا عارف أنا هدفي فين من زمان وبحب الفن والمزيكا وأحب أعبر عن نفسي بالمزيكا ومش مفقتد تعبير إضافي من خلال التمثيل.

حمزة نمرة: أنا بطبعي انطوائي 

وكشف حمزة نمرة عن طبيعة شخصيته، قائلا: أنا بطبعي انطوائي وماليش شلل وقلت ده في أغنية رايق وكنت قاصد والأغنية معبرة عني فعلا لأني ماليش في أي شلة ولا فاضي لناسي مملة ولا حد كاسر عيني ولا معادي حد ولا حد معاديني ولا عاوز أشوف مين ورايا ولا أنا سابق مين وعاوز امشي في طريقي وأعمل الفن اللي بقدمه بروقان والنجاح والتوفيق وعدمه من ربنا ولازم أفكر نفسي بالكلام ده طول الوقت لأن ده أصل حبي للفن مش المنافسة، والشهرة النجاح رزق من ربنا ده وتوفيق من ربنا.

واضاف: اتعلمت إن رأي الناس اللي حواليا هو الأصح، من رأيي أنا في أغاني، والدواير القريبة مني رأيهم الأصوب وشفت ده ولمسته في أكتر من أغنية زي داري يا قلبي ورياح الحياة وفاضي شوية.

حمزة نمرة: زوجتي هي المستشار الأول في حياتي ووالدي كان محب الفن

واختتم حديثه، قائلا: اللي أقدر أقدمه إني أقدم أحسن ما عندي واجتهد في الكلمة واللحن والتوزيع وأتمرن كويس وأكون بأفضل صورة ممكنة وماليش في الصراعات ومحبش أكون فيها، ولما نزلت الألبوم في الصيف دخلني غصب عني في الصراعات لأن ده موسم وكل الناس بتنزل في الوقت ده ومكانش قصدي ولو حد شايل مني أرجو إن قلبه من ناحيتي يكون صافي لأن أنا عمري ما أعمل صراعات ولا أحبها.