يسرا: قسوة أبويا مأثرتش على نظرتي للرجالة.. وأول ما شوفت يوسف شاهين قولتله بحبك

كشفت النجمة يسرا عن تفاصيل زيجاتها، وذلك من خلال لقاء لها ببرنامج بيت السعد، الذي يقدمه كلا من الفنان أحمد سعد وشقيقه الفنان عمرو سعد، عبر شاشة تلفزيون قناة إم بي سي وان.

تصريحات يسرا عن زيجاتها

وقالت يسرا في تصريحاتها التي يرصدها موقع تحيا مصر: قسوة أبويا عليا مأثرتش على نظرتي للراجل، وعمري ما تصورت أن كل الرجالة زي أبويا، أنا اتجوزت مرتين، المرة الأولى متوفقتش لأن مكناش نعرف بعض كفاية ومكنش جواز ناجح بصراحة، والجوازة التانية خالد جوزي ربنا يديمه يارب وبحبه جدا، واحنا نعرف بعض وعمرنا 7 سنين، وعلاقتي بيه علاقة صحاب مش زوج وزوجة، وفي الأول مأعلناش جوازنا لأن صالح سليم كان عيان، ومش صحيح أنه مكانش موافق على جوازنا، دا هو اللي مربيني وكان صاحب خالي وأمي، والكلمة الوحيدة اللي قالها صالح سليم لابنه الست دي نجمة هتستحمل نجوميتها ومتقرفهاش خدها، مش هتستحمل سيبها في حالها.

قصة اسم يسرا الحقيقي

وعن اسمها الحقيقي قالت يسرا: اسمي الحقيقي اللي في شهادة الميلاد يسرا واسم الدلع اللي في البيت كان سيفين وأنا عمري ما عرفت أن دا اسمي إلا وأنا عندي 19 سنة لدرجة أن أنا شهاداتي كلها سيفين، ودا اسم تركي ومعناه الوردة اللي مش بتموت.

وعن أول لقاء يجمعها بالمخرج يوسف شاهين قالت: لما يوسف شاهين في يوم نقاني في حدوتة مصرية، وأنا كنت بموت فيه، وأول لما شوفته قولتله أنا بحبك أوي قالي عندك ذوق ومكنتش متصورة أن ممكن تجيلي فرصة معاه، وكان دايما يقول عني، أنا أخدتها نجمة معملتهاش نجمة.

أحمد سعد يطرح أغنية نغزة بالتعاون مع يسرا

يسرا: اتحاربت كتير.. وأول مرة اشوف أبويا كان عندي 5 سنين

تصريحات يسرا عن بداياتها الفنية

وفي اللقاء ذاته، كشفت يسرا عن تعرضها لصراعات وحروب، فقالت: اوعى تفتكر أني متحاربتش، وأوعى تفتكر أني منهزمتش، وأوعى تفتكر أن الحكاية كانت كدا سهلة لا.. أنا كان بيبقى في صراعات غير عادية معايا وأنا مكنتش قدهم ومكانش ينفع أني اخانقهم لأني كنت ضعيفة، وقعدت 4 سنين عملت فيهم 25 فيلم منزلوش و كانوا بيسموني النجمة المعلبة.