بنحضر للمداح 5 وهيكون أعلى من اللي فات.. وبتمنى نقدم التجربة الدنماركية 2| أبرز تصريحات خالد سرحان
ADVERTISEMENT
كشف الفنان خالد سرحان عن تحضيره للجزء الخامس من مسلسل المداح، وعبر عن أمنيته في تقديم فيلم التجربة الدنماركية 2، من خلال لقاءه ببرنامج عيش صباحك عبر شبكة راديو نجوم إف إم.
خالد سرحان: كل الناس عايزين جزء جديد من المداح
تحدث خالد سرحان عن نجاح مسلسل المداح من خلال برنامج عيش صباحك، رصده لكم موقع تحيا مصر، وقال: "كل الناس عايزين جزء جديد من المسلسل لكن الموضوع صعب إنك لازم تعمل حاجة أعلى من اللي فات وده الصعب في موضوع الأجزاء لأنك لازم تقفل حلو".
وأضاف خالد سرحان قائلًا: "موضوع المسلسل شائك ولو مش مقنع 100% هيقلب كوميدي، لكن إحنا بنحضر كويس وبننتج كويس والمؤلفين بيبحثوا كتير وبيقدموا حاجات بين السطور خلال المشاهد".
خالد سرحان: عملت الأجزاء كتير ومتعود عليها
وعن تجربة الأعمال ذات الأجزاء أكد خالد سرحان أنه قام بها من قبل، وعلق قائلًا: "عملت الأجزاء كتير في العيادة ويوميات زوجة مفروسة فأنا متعود على ده وإني أشتغل على الأجزاء، لأن ساعات بيبقى حد بيستغل بس نجاح الجزء الأول وما يعملش حاجة جديدة فكده ده بيبقى بيخدع الجمهور".
خالد سرحان: شخصية حسن هي نقطة في بحر
أما عن شخصيته في مسلسل المداح قال خالد سرحان: "شخصية حسن هي نقطة في بحر لأنها بتاعت الضحك جوه مسلسل رعب وعشان تظبط ده ما ينفعش تمشي على نفس النمط خلال كل الأجزاء ولازم يبقى الكوميديا من جوه الموقف نفسه".
خالد سرحان عن حريم كريم 2: مبهج وفيه ضحك كتير
ومن جهة أخرى، تحدث خالد سرحان عن مشاركته في حريم كريم 2 ، وقال: "هو فيلم مبهج وفيه ضحك كتير وهو متصل بالجزء الأول، وإحنا عالجنا كل حاجة وعملناه لما هم كبروا وولادهم كبروا، ولو اتفرجت على الأول والتاني بعده هتحس إنهم نفس الشخصيات بعد ما كبروا، والهدف الأساسي كان النوستالجيا ومخاطبة الجيل اللي مرتبط بالجزء الأول".
خالد سرحان: أتمنى تقديم التجربة الدنماركية 2
وأشار خالد سرحان عن أمنيته في تقديم التجربة الدنماركية 2 مع الزعيم عادل إمام، وقال: "أحب نعمل له جزء تاني والأبطال موجودين والأستاذ عادل موجود ربنا يديله الصحة، هو اللي اكتشفني ودعم نجوم كتير هو أسطورة كبيرة وصعب تكرارها وربنا يديله العمر".
جوجل نيوز
تطبيق نبض
