أحمد صبري غباشي: كل واحد بقى يعمل من أهل بيته تريند.. وأتمنى أشتغل مع ماجد الكدواني |خاص

قام الفنان الشاب أحمد صبري غباشي بتقديم الحفل الخاص بافتتاح مسرح الرواد الذي أُقيم بالأمس الأربعاء الموافق 22 من شهر مايو، وذلك لإيمانه بالشباب الموهوب في المسرح ولمساندتهم.

خلال فعاليات حفل افتتاح مسرح الرواد حاور موقع تحيا مصر الفنان أحمد صبري غباشي ليكشف لنا عن تفاصيل أعماله القادمة، وكواليس مشاركته في حفل افتتاح مسرح الرواد ورأيه في السوشيال ميديا وما تقدمه للفن.

أحمد صبري غباشي: شباب المسرح بيمشوا عكس التيار.. وشجعني على المشاركة مجهودهم

تحدث أحمد صبري غباشي عما شجعه في المشاركة في حفل افتتاح مسرح الرواد وأبدى إعجابه وفخره بالشباب الذي عملوا على تطوير المسرح وهو الأمر النابع من حبهم للمسرح وقال: "بالرغم من إن انهاردة أول علاقة ليا بمسرح الرواد لكن بحس إن بيني وبين الشباب القائمين على المسرح والافتتاح علاقة قوية بسبب حبهم للمسرح واجتهادهم واهتمامهم به، وإنهم بيمشوا عكس التيار وعلى ما اسمع إن المكان دا كان كهف وهما قدروا بمجهودهم انهم يفتتحوه ويخلوا ليه جمهور وناس بتجيله من كل مكان".

أحمد صبري غباشي: المسرح مظلوم وضعف التمويل هو السبب الأساسي

كشف أحمد صبري غباشي عن سبب قلة الأعمال المسرحية من وجهة نظره وقلة الاهتمام بالمسرح في الدولة بالرغم من كونه أبو الفنون كما يُقال، وقال: " المسرح بشكل عام مظلوم ونجومه كمان مش الشباب بس مش متسلط عليهم الضوء وحاليًا بنحاول نزود الدعايا على السوشيال ميديا أو التغطيات للعروض وغيرها من الوسائل عشان نظهر المسرح أكتر".

محسن محي الدين: مفيش تعويذات حقيقية في المداح.. ومبقاش في مسارح في الدولة |خاص

في أول أيام عرضه.. فيلم بنقدر ظروفك يخفق في تحقيق إيرادات بالسينما

وأضاف: "شايف السبب الأساسي راجع لقلة التمويل ومفيش منظومة ثابتة تدعم المبدعين في المسرح بالإضافة إلى أن مفيش ورق، المخرجين والمؤلفين يقدروا يطوروا المسرح لكن دا مش حاصل واحنا بنحاول نعمل كده".

أحمد صبري غباشي يكشف رأيه في السوشيال ميديا: كل واحد بقى عايز يعمل من أهل بيته تريند

تطرق الفنان أحمد صبري غباشي خلال الحوار ليتحدث عن السوشيال ميديا ودورها في الفن وهل هي من ضمن الأسباب لتراجع الفن والمسرح: "السوشيال ميديا سلاح ذو حدين هي قدرت تقدم نجوم كبار كتير دلوقتي منهم أحمد أمين وطه دسوقي ودول جايين من السوشيال ميديا فهي ليها تأثير كويس، لكن للأسف صوت التريندات السلبية هو اللي عالي ومتصدر عشان كده لازم نهتم بالمسرح لأنه بيبني نجوم حقيقيين".

وأضاف: "أنا بهتم بالسوشيال ميديا ونشط عليها وليا تريندات ومعنى كلامي مش إني بتكبر على السوشيال ميديا لأنها بقت أساسية في حياتنا، كل واحد بقى يعمل من بيته ومراته وولاده تريند ودا راجع إنه مفيش فكر ومفيش مسرح لو في مسرح مش هيكون دا شكل الناس أو دي طريقة تفكيرها".

أحمد صبري غباشي: المقارنة بين الأجيال ملهاش معنى.. وبحضر لفيلم ومسلسلين قريبًا

أبدى أحمد صبري غباشي رأيه في المقارنة المستمرة بين الأجيال الحالية من شباب الفن بالأجيال السابقة وقال: "المقارنة ملهاش معنى كل جيل ليه ظروفه ومبدعينه وانا مش مع فكرة الزمن الجميل وكل جيل ليه مبدعينه والشباب الموجود انهارده منهم ناس تقيله وتستحق انها تبقى نجوم، وبالنسبالي قربت من البطولة كتير وعملت أعمال كتير منها دور تاني".

وأضاف: "حاليًا بحضر لفيلم مستقل مع مخرج شاب صديقي وفي مسلسلين اوف سيزون لسه مش اكيد، ومن كام سنة كنت أتمنى أشتغل مع يحيى الفخراني ودا حصل الحمدلله واشتغلت مع كريم عبد العزيز ونيللي كريم وكلها ناس بحبها، وأتمنى أشتغل مع ماجد الكدواني ولو مخرجين تامر محسن محمد ياسين وكاملة أبو ذكري".