محسن محي الدين: مفيش تعويذات حقيقية في المداح.. ومبقاش في مسارح في الدولة |خاص

حرص الفنان القدير محسن محي الدين على حضور حفل افتتاح مسرح الرواد بعد تطويره الذي أُقيم بالأمس الأربعاء الموافق 22 من شهر مايو، وذلك تأكيدًا على دعمه للشباب المبتدئين وحبه للمسرح.

التقى موقع تحيا مصر بالفنان محسن محي الدين خلال فعاليات الاحتفال بافتتاح مسرح الرواد ليكشف لنا تفاصيل حضوره الافتتاح وسبب حرصه الدائم على دعم الشباب وتفاصيل أعماله القادمة.

محسن محي الدين: من جوايا شاب.. والدولة مبقاش عندها مسارح

تحدث الفنان القدير محسن محي الدين عن حرصه الدائم على دعمه للشباب والسر وراء ذلك وسبب تواجده في أي عمل يخص الشباب وقال: "أنا من جوايا شاب ومن وانا صغير بحب أقدم أفكاري والناس تدعمني فيها فـ كان لازم لما اكون في موقف في ايدي أدعم الشباب أكون حاضر، وأكيد شايف شباب المسرح الموهوبين مظلومين لأن مبقاش في مسارح في الدولة".

وتابع حديثه عن فخره بمعافرة شباب مسرح الرواد لإعادة المسرح وإحياؤه مرة أخرى بعدما كان يعتبر مهجور قائلًا: "الخطوة اللي الشباب اخدوها هنا في مسرح الرواد هما بيحاولوا يوقفوه تاني لأنه كان مهجور وبيقدموا فيه عروض من حبهم في المسرح لكن للأسف حتى مسارح الدولة مبتديهاش للشباب عشان يعملوا فيها فن ويطلعوا طاقتهم، بنشوف أسعار الإيجار عالية جدًا وتحس العملية أصبحت تعجيزية والدولة مبتساعدش فالشباب اصبحوا بيسعوا لتقديم نفسهم ويحاربوا عشان يظهروا".

محسن محي الدين: في ناس كانت بتتمنى فشلي في بداياتي وشاركت في ريفو لدعم الشباب

محسن محي الدين: مسلسل المداح مهم لأنه بيظهر مداخل الشيطان المتجسد في صورة إنسان

محسن محي الدين: مفيش حاجة اسمها مقارنة ولولا الأجيال اللي فاتت مكنش هيبقى في فن

أبدى محسن محي الدين رأيه في المقارنة الموجودة بين أجيال الشباب الحالية في الفن والأجيال السابقة وذلك في تصريحاته مع موقع تحيا مصر وأكد على عدم صحة هذه المقارنة وقال: "مفيش حاجة اسمها مقارنة احنا في زمن وهما في زمن ولا ينفع نمحي اللي قبلنا ولا ننكر اللي جاي، ولولا الاجيال اللي فاتت مكنش هيكون في فنانين دلوقت يالأجيال اللي فاتت هي اللي صنعت الفن والإرث اللي سابوهلهم من الفن هو اللي خلاهم يحبوه".

وكشف الفنان محسن محي الدين رأيه في قول أن الفنانين الشباب تفوقوا على الأجيال السابقة في الفن واستنكر هذه المقولة قائلًا: "مينفعش عشان نقول الجيل دا عظيم نهدم اللي قبله اللي حصل اننا نستمد من اللي قبلينا مواهبهم وقدرتهم لكن ليه عشان نظهر لازم نهدم اللي قبل كده، دي مشكلتنا كمصريين في الوزارات او التجارة او الصناعة المدير اللي يجي لازم نهدم اللي فات ونعمل خط جديذ لكن برا مفيش كده لازم يكون في خطة واللي يجي يمشي على الخطة.. في عملية استمرارية في الاجيال كل جيل يحترم".

وتابع موجهًا نصيحة للشباب: "عايز اقول للشباب حاربوا عشان تثبتوا وجودكم وموهبتكم حتى لو الظروف مش بتساعد لازم تطلعوا شغلكم للنور".

محسن محي الدين يكشف حقيقة تعويذات مسلسل المداح

تطرق الفنان محسن محي الدين خلال اللقاء ليتحدث عن تفاصيل مسلسل المداح والأقاويل التي يتداولها رواد مواقع التواصل الاجتماعي عن حقيقة التعويذات في المسلسل وطلبهم من الجمهور عدم مشاهدته وقال: "مفيش تعويذات حقيقية في المداح دي حاجات هما اللي كاتبينها وملحنينها وكاتبين الاشياء دي كلها، دي حرب سوشيال ميديا لأعمال أخرى لما بيلاقوا في عملية جذب لمسلسل ومسلسلات أخرى مبتجذبش بيكسروا دا عشان يظهروا حاجة تانية".

وأضاف: " وبالنسبة للسوشيال ميديا كل حاجة فيها الضرر والنفع لكن احنا دايمًا بناخد الشئ بدل مابيكون نافع بنخليه ضار السوشيال ميديا ليها نفع وضرر لكن احنا بنستخدم الضرر اكتر للاسف".