صلاح الشرنوبي: سلوك مطربين المهرجانات غير لائقة.. وبكيت بكاء فظيع بعد وفاة ذكرى

كشف الموسيقار صلاح الشرنوبي عن رأيه في أغاني المهرجانات والراب، وذلك خلال لقاء له ببرنامج حبر سري المذاع عبر شاشة تلفزيون قناة القاهرة والناس، والذي تقدمه المذيعة أسما إبراهيم.

صلاح الشرنوبي: سلوك مطربين المهرجانات غير لائقة

وقال صلاح الشرنوبي في تصريحاته التي يرصدها موقع تحيا مصر: الرقي عكس المهرجانات والراب بسبب زعماء هذا القالب اللي أنا بحبه باستحياء لأن مزيكته حلوة وسلوكهم والكلمة، ومصر مستفتدش حاجة من المهرجانات أو الراب، وقالب المهرجانات بيعجبني بس بنتقد سلوكيات أصحابها من ناحية الكلام والثقافة، ولا تليق بمطرب يمثل مصر ويطلع تريند في العالم كله، وفي مطربين راب كويسين زي ويجز ومروان بابلو دول كويسين وممثلين مصر كويس.

وتابع: أنا عاجبني التراب والراب مش أوي واللي بيتبعه أحمد مكي أنا بحبه أوي، والمهرجانات فيها كلام أنا مش بقدر استوعبه ولو اتعرض عليا مش عارف أقوله ازاي.

صلاح الشرنوبي: عمرو مصطفى مختلف

وعن رأيه في الملحنين الموجودين حاليا في الساحة الفنية قال: كل الملحنين الموجودين على الساحة كويسين بس توحدت المقامات، بس الحمد لله عمرو مصطفى مختلف، وليد سعد حلو عنده جملة ومخزون حلو وعزيز الشافعي عنده مخزون حلو متطور وجملة جديدة، وأتمنى أكون أهل لهذه المسئولية أني أكون امتداد لبليغ حمدي.

مسلسل نعمة الأفوكاتو الحلقة 14.. صدمة أروى جودة بوجود ملايين صلاح رغم مشاهدة فيديو حرقها

محمد الشرنوبي عن حفل عمه صلاح الشرنوبي: مبسوط اني كنت جزء من ليلة كبيرة وضخمة زي دي

وعن لحظة علمه بوفاة ذكرى قال: أنا كنت عند ناس أصدقائي سهرانين ونمت شوية سنة 2002 وبعدين بصيت على التتر على التلفزيون قدامي صعقت ومحستش بنفسي، بكاء فظيع، ذكرى ليها مكانة عندي عظيمة، ومكنتش عارف أكلم مين، كلمت هاني مهنا ومفيش دقايق لقيت نفسي بجري ورايح عند الشقة وروحت وأنا ضايع، وقعدت سنين بعدها كل ما أغني أغنية الأسامي أبكي وأغنية اللي راح من عمري.

صلاح الشرنوبي: عمرو دياب ذكي ذكاء خارق

وفي اللقاء ذاته، تحدث الموسيقار صلاح الشرنوبي عن مشاريعه التي لم تكتمل مع الهضبة عمرو دياب، وقال: لازم كنت أعمل تاريخ مع عمرو دياب لأنه عارف يسوق نفسه صح جدا وبيعمل الحاجات اللي تليق عليه جدا ومعندوش هفوات خالص ومتميز، ومندمتش على عدم التعاون معاه لأني قابلته أكتر من مرة وبنفكر في مشاريع سوا بس المشكلة أنه سايق المسألة بطريقته، والمشروع اللي بيننا مكملش، مكنش عندي مانع أنه يسوق لأني شايف سواقته صح، وهو ذكي ذكاء خارق، وكان نفسي أعمله حاجة أنا تميزت بيها، وعلى فكرة هو اللي أطلق عليا متميز في سرعة 90 وقال عني حاجات كتيرة أوي.