غدروا بيه وواثقة في القصاص.. زوجة ضحية جيرانه بـ الدقهلية: قتلوه قدام ابنه|فيديو
ADVERTISEMENT
تطورات مثيرة في واقعة مقتل شاب أربعيني في الدقهلية، حيث التقى موقع تحيا مصر أسرة المجني عليه غانم الشحات 40 عاما والذي غدر به جيرانه وأنهوا حياته، حيث تنظر المحكمة أولى جلسات محاكمة المتهمين يوم 23 مارس القادم.
زوجة ضحية جيرانه في الدقهلية: جريمة بشعة
وقالت زوجة ضحية الدقهلية في تصريحات لـ موقع تحيا مصر، جريمة قتل بشعة جدا كانوا مترصدين بينا قبلها بشهر وكل يوم والتاني كانوا بيقولوا أنهم هيعلموا عليه أو على ولاده ومجاش في بالنا أنهم هيقتلوا وقولنا أنهم هيتخانقوا هيضربوا أو أي حاجة، وهما كانو 5 داخلين علينا البيت والجيران قالولنا اقفلوا البيت عليكم.
وتابعت زوجة ضحية الدقهلية، هو كان جاي هو وابنه على الموتوسيكل بيجيب اللبن وهما غدروا بيه ومااستكفوش انهم يخبطوه خبطة واحدة لكن هما كانوا عايزين يقتلوه ومتعمدين وفضلوا يضربوا فيه قدام ابنه، وهو كان شغال 3 شغلنات ومش فاضي كان راجل مكافح وعايز يكفي طلبات بيته وعياله.
زوجة ضحية جيرانه: هما عالم بلطجية وكل الناس عارفة
وأكدت زوجة ضحية الدقهلية، تم القبض عليهم كلهم ولكن لسه في واحد هربان وباعتين تهديدات بيقولوا طارق بره إذا لم يتم التنازل طارق هيخلص على كل اللي برة، وهما كلهم شباب قتلوا جوزي وخلصوا عليه، وسيرة جوزي في منية سندوب معروفة ومش عارفة هما عملوا كدة ليه.
وأضافت زوجة ضحية الدقهلية، أنا نفسي أعرف هما عملوا كدة ليه هما عاملين مشاكل مع كل البلد وهما بلطجية معورين ناس كتير وضاربين ناس كتير ولما الموضوع بيوصل بيدفعوا للناس فلوس ويتصالحوا، وبعتنا ناس أحنا معملناش حاجة وقولنا نتصالح عشان عندنا عيال وعايزين نمشي جوا الحيطة ومش عايزين مشاكل مع حد.
زوجة ضحية الدقهلية: غدروا بيه وقتلوه قدام ابنه
وشرحت زوجة ضحية جيرانه في الدقهلية، استنوه وهو بيشتري الحاجات وجريوا وراه في الشوارع والناس لما حاولوا يحوشوا عنه قالولهم ملكوش دعوة وفضلوا يضربوا فيه ضرب غل لحد ما خلصوا عليه، كانوا عائلة كاملة ترصدوا بيه وأشتروا اسلحة جديدة وعاملين حسابهم أنهم يخلصوا عليه ويسافروا، والشرطة قبضت عليهم في 4 أيام.
وأفادت زوجة ضحية الدقهلية، الجلسة متحددة وهما هيتحاكموا، هما المتهمين ضمروا العيلة وضمروني وأبني تعبان نفسيا من يوم ما شاف الحادثة، والكبير عنده حالة نفسية وأحنا أسرة راحت خلاص وحصل اللي حصل، وأنا مش عارفة اقول ايه وهما عملوا كدة ليه معاه.
وأنهت زوجة ضحية جيرانه في الدقهلية حديثها قائلة «معندهمش رحمة وقعدوا يخبطوا على المحلات وعايزين يعملوا معانا اي مشاكل ويكسروا المحلات عشان حد مننا يخرج لهم، وأهل الشارع مخرجوش من البيوت، وفضلوا يضربوا في غانم وأن شاء الله القضاء المصري عادل وهيجيب لنا القصاص من الـ 5 متهمين دول على اللي عملوه».
جوجل نيوز
تطبيق نبض
