والد «عادل إمام» ضحية الفيوم: مستني الحكم وعياله بيقطعوا قلبي | فيديو
ADVERTISEMENT
نظرت محكمة جنايات الفيوم جلسات محاكمة المتهمين بإنهاء حياة سائق توك توك لسرقته، حيث قررت تأجيل القضية لمناقشة الطبيب الشرعي، وكشف والد المجني عليه «عادل امام » سائق توك توك تفاصيل مثيرة عن الجلسة وعن الواقعة.
والد ضحية الفيوم: انا منتظر الحكم بفارغ الصبر
وقال والد المجني عليه لـ موقع تحيا مصر، أنا منتظر الحكم في القضية بفارغ الصبر، وعادل ابني الله يرحمه سايب بنتين وولد، ربنا ينتقم منهم سرقوا التوك توك وقتلوه، خدوه عشان يوصلهم وبعدها فضلوا يضربوا فيه لحد ما مات، وسرقوا التوك توك وسابوه مرمي وطبعا الكترة تغلب الشجاعة.
وتابع والد ضحية الفيوم، عادل ابني عنده 3 عيال بنتين وولد، والله يصبر والدته ويعينها على اللي حصلنا، الله يرحمه مكنش يختلف عليه اتنين والحمد لله من ربنا كان الكل بيشهد له بالأخلاق والحقيقة هي دي في منطقته وبس بدعي ربنا يصبرني على فقدان ضنايا الله يرحمه، ورغم أن الجريمة عدى عليها سنة لكن لسه في قلبي.
والد ضحية الفيوم: عياله بيقطعوا قلبه كل ما يتكلموا
واضاف والد ضحية الفيوم، غدروا بـ عادل ابني وربنا ينتقم منهم حسبي الله ونعم الوكيل، ومنتظرين الحكم بفارغ الصبر عشان قلوبنا تبرد، لو نقول أنه مات طبيعي هيكون أهون عندي لكن الغدر بيه والسرقة وأنهم يعملوا كدة طبعا مش قادر اعيش واللي يريحني ويريح أهله كلهم القصاص من المتهمين.
وأكد والد ضحية الفيوم، أن ابنائه يعلموا أن والدهم توفى، وعايز أقول لو أنا جيت اصحيه الصبح ولقيته ميت هقول عادي لكن هو معملش حاجة عشان يعملوا كدة فيه، وأحنا واثقين إن شاء الله أن بالقصاص والحق والعدل، وأن المحكمة هتقتص من المتهمين وهيجبوا حق عادل الله يرحمه، مشيرا إلى - أنا تعبان لما بسمع صوت عياله وهما بيقولوا يابابا وهو مش موجود - دي أكتر حاجة بتوجعني.
محامي ضحية الفيوم: نثق في عدالة القضاء والقصاص قادم
وقال محامي ضحية الفيوم، إذا كان هناك محاولة لوجود أدلة تعدل من مسار القضية لكن الواقعة ثابتة من إعترافات أحد المتهمين، ومناقشة الطبيب الشرعي لن يزيد إلا أسباب تؤكد ثبوت الأدلة والاتهامات ضد المتهمين ونحن لا نعلق على أحكام القضاء ولكن نثق جيدا في أن القصاص العادل سيكون قريبا.
جوجل نيوز
تطبيق نبض
