مروة عبد المنعم: ربنا عالم أنا ليه مش محجبة وواثقة أنه بيحبني

كشفت الفنانة مروة عبد المنعم عن رأيها في الحجاب وما يتعلق به، وذلك خلال استضافتها مع ابنتها حور، في برنامج البيه والهانم الذي تقدمه الإعلامية نورين شحاتة و ممدوح الشناوي على قناة القاهرة والناس.

تحيا مصر يرصد حديث مروة عبد المنعم عن الحجاب وعلاقتها بالله. 

مروة عبد المنعم تفكر في ارتداء الحجاب

وقالت مروة عبد المنعم: جات لي فكرة الحجاب في نفس سن بنتي وكنت في أولى إعدادي وقلت لماما قالت لي لما تكبري خدي القرار، كنت ساعتها عايشة روحانيات الحجاب خاصة أني كنت عايشة في السعودية.

رأي مروة عبد المنعم في الحجاب

وتابعت مروة عبد المنعم، مقتنعة جدًا بالحجاب وربنا عالم أنا ليه مش محجبة، وده حساب بيني وبين ربنا، وفخورة جدًا ببنتي وأتمنى ربنا يثبتها على الحجاب وسعيدة بالقرار اللي خدته، ولو جه عليها فترة وزهقت وخدت قرار تخلع الحجاب مش هقف ضدها.

علاقة مروة عبد المنعم بالله

وأردفت، أنا بيني وبين ربنا عمار كبير جدًا، وعندي علاقة خاصة بيني وبين ربنا ما يصحش أني أقولها لأني بحبها، وواثقة في ربنا وكرمه وحبه ليا وواثقة أنه بيحبني جدًا وبيبعت لي رسايل كتير جدًا وبيكلمني كتير جدًا.

واستطردت مروة عبد المنعم، مؤمنة أن ربنا بيكلمنا في كل لحظة ومن يستطيع أن يقرأ رسايل الله مش أي حد أنا بقرأ رسايل ربنا ليا، ومؤمنة إني في الجنة مش بالشعر نهائي، ومحدش عارف فيه إيه بيني وبين ربنا، وأنا أخلاقيًا الناس كلها عارفة أخلاقياتي ومش محتاجة أني أتكلم عنها ودينيًا ربنا وحده بس اللي عارف بيني وبينه إيه.

وعن ارتداء ابنتها الحجاب قالت: اعترضت في البداية لأني عارفة دماغ بنتي لأنها أبعد ما تكون عن الحجاب لأن حور بتحب الحياة وعاوزة تعيش وتلبس وكنت بتخانق معاها أن لبسها قصير، وفجأة قلت لها أنتي هتتحجبي فعلًا ده قرار صعب، قالت لي ماما أنا مخضوضة ما تخوفنيش، قلت لها خدي القرار زي ما أنتي عاوزة، وهي دايمًا كده في قرارتها لما تكون عاوزة الحاجة لازم تحصل.

وتابعت، حبيت فكرة تصوير الفيديو لأني بشوف بنات بتتحجب وبيعملوا كده مع أهاليهم، وكان مهم أعرف رد فعل كل عائلتي، وكلهم ما تخيلوش أن حور ممكن تتحجب.

اقرأ أيضًا.. 

عابد عناني: رفضت أعمال كتير مؤخرًا لهذا السبب 

خاص| طارق الشناوي يقاضي مصطفى قمر بعد تطاوله عليه: فاكر القانون مش هيطوله 

وأوضحت مروة عبد المنعم، كل واحد أدرى ببيته وولاده، وحور وهي داخلة عليا قلت لها إيه الهبل ده، وده طبيعي أنا وبنتي بنتكلم، الناس خدوها إيه الهبل ده على أني بتكلم عن الحجاب، وقالوا إزاي تقولي كده، ولكن ده حوار بيني وبين بنتي ومش قصدي أقول عبط على الحجاب بقول إيه العبط ده يعني ما تهزريش في الموضوع ده.