بعد تصريحات محمد سلام.. عمرو سلامة: الفن مهنة نبيلة وفاتحة بيوت مش فساتين وسجادة حمرا

حرص المخرج عمرو سلامة على الدفاع عن الفن وذلك بعد الجدل الذي نشب في الفترة الأخيرة بين مؤيد ومعارض للفنان محمد سلام بعد اعتذاره عن المشاركة في فعاليات موسم الرياض السعودي بسبب عدم قدرته على الرقص والغناء في ظل الأزمة التي تمر بها فلسطين.

تحيا مصر يرصد في ذلك التقرير تصريحات المخرج عمرو سلامة عن الفن

عمرو سلامة: السينما مش أجور مستفزة لفنانين وفستان على سجادة حمراء

وكتب عمرو سلامة عبر حسابه الرسمي بموقع التدوينات القصيرة “تويتر”: سينما مش أجور مستفزة لفنانين وفستان على سجادة حمرا،  الطرف الآخر انتصر وبينتصر وكسب تعاطف العالم لإنه تحكم في السردية العالمية، تحكم فيها بالفن أولا وثانيا وثالثا، الفن اللي أغرقه بقصصه وحكاياته، وقدر بيهم يتحكم في وعي العالم كله، وبعد الفن استخدم إعـلام وسياسة وسـلاح ورأس مال، بس كان وسيلته الأهم الفن.

وتابع حديثه، قائلا: السينما والفن صناعة، ١٠ في المية من العاملين فيها بياخدوا أجور عالية نسبيا آه،ولكن ٩٠٪ من العاملين فيها ناس بتجري على أكل عيشها وعايشة بالكاد، لو توقف الفن الناس ديه هتجوع مش هتدفع أقساطها ومش هتاكل عيالها، ماينفعش تروح لراجل في مصلحة حكومية وتقوله امضي لي ورقة فيقولك مش قادر بسبب أحداث سياسية دمـوية مأثرة عليا، ماينفعش تقول لميكانيكي صلحلي العربية يقولك مش قادر صور الدمـار مأثرة فيها.

عمرو سلامة: متفهم اكتئاب أي فنان ولكن انت بتأذي ناس كتير

وتابع عمرو سلامة حديثه، قائلا: هو آه إسمه ترفيه بس هو صناعة، طالما مانتاش ماسك سـ/ـلاح بتحـ/ـارب العـ/ـدو في أرض المعـ/ـركة دورك تشتغل وتعمل دورك في المجتمع، لان ده اكل عيشك واكل عيش ناس كثير غيرك، متفهم جدا اكتئاب أي فنان أو إنسان، وأحترم كل المواقف الشجاعة، ولو عند أي حد رفاهية عدم الشغل وهو مكتئب هيبقى مفيد يريح ويهتم بصحته النفسية، لكني أشعر بس كمان إن علنية المواقف ممكن تئذي ناس كثير غيره وتحط عليهم ضغط لا يستحقوه.

واستكمل: وكل خوفي يكون الفنان نفسه مش مقدر فنه، وعنده صوت داخلي جواه مستهيف الفن أو مستحرمه أو مستحقره، لإن لو الفنان نفسه شايف الفن كده فده يبرر ليه شريحة كبيرة من الناس شايفه الفن كده، رقص وهلس وعري وفلوس ع الأرض وشكرا، الفن في رأيي عمل زي أي عمل، ويضاف عليه إنه قادر على تشكيل وعي البشرية، قادر إنه يطبب عليهم في وقت صعب، قادر إنه يخلينا كإنسانية نفهم بعض أكثر.

عمرو سلامة: كلامي مش نيته مهاجمة لحد ولكن الدفاع عن مهنتي

واختتم عمرو سلامة حديثه، قائلا: أنا كلامي أقسم بالله مش نيته مهاجمة حد خصوصا لو حد بحبه- ولا الدفاع عن حد، هو دفاع عن مهنة فاتحة بيتي، ومهنة بتعطيني سبب للحياة، ومهنة أنا في منظوري شايفها نبيلة، ولو ماكنتش شايفها كده ماكنتش هشتغل.