حوار| محمد حسني: عمرو عبدالجليل حالة خاصة بالنسبة لي وفيلم الخميس اللي جاي قائم على الكوميديا الموقف

تستعد أسرة فيلم الخميس اللي جاي لـ عمرو عبدالجليل لطرحه في السينمات، وهو قائم على الكوميديا الموقف، تدور أحداثه في إطار الرعب الممزوج بالكوميديا حول قصر يلعن سكانه.

وأجرى تحيا مصر حوار خاص مع الفنان محمد حسني أحد أبطال فيلم الخميس اللي جاي، للكشف عن كواليس العمل مع أبطاله وعن دوره بالفيلم، وإليكم نص الحوار كتالي:

حدثنا عن فيلم الخميس اللي جاي؟

الخميس اللي جاي بطولة جماعية فيها نجوم كبير جدًا محبوبين عند الناس، أستاذ عمرو عبدالجليل حالة خاصة بالنسبة لي لأن مش أول مرة نشتغل مع بعض، وأشتغلنا مع بعض في حاجات كتير أوي على مستوي الشخص أنا بحبه جدًا بعتبره أخ وصديق لأنه اجتماعيًا وإنسانيًا محترم جدًا.

ما سبب حماسك لانضمام لفيلم الخميس اللي جاي؟

فيلم الخميس اللي جاي  من ساعة ما جاب الورق من أحد أسباب الموافقة وجود أستاذ عمرو عبدالجليل وأستاذ بيومي فؤاد وأستاذ محمد عبدالعظيم وأستاذة مي كساب كلهم أصدقاء وناس جميلة، شغلي معهم في حد ذاته حاجة جميلة أوي

وماذا عن كواليس فيلم الخميس اللي جاي؟

الكوميديا في الكواليس خليني أقولك الضحك أثناء البروفات كان يعمل 5 أو 6 أفلام لوحده الله يكون ي عون أستاذ حسن المخرج لأنه هيبقى محتار جدًا لأن عنده كتير ضحك وتمثيل لحد ما يوصل للي هو عايزه ربنا معه

هل هناك مواقف تم إضافتها بشكل إرتجالي في الفيلم؟

وكان لازم يكون في حاجات ضفناها أثناء التصوير وهي مش موضوع إرتجال لكن لما بتشتغلي على دورك في التنفيذ هتلاقي في حاجات جديدة بتقترحيها مع المخرج والمؤلف ممكن يقوك آه دي كويسة أوي وبتقترحيها مع زميل ليكي والحاجات دي ضرورية، لأن من خلال شغلك ومجهودك في الدور لازم يظهر حاجات.

ماذا عن شخصيتك في فيلم الخميس اللي جاي؟

عامل شخصية أمين وهو شخصية تاريخية شويه مع الأستاذ محمد عبدالعظيم أوقات كتيرة كان هو البواب والسفراجي والطباخ بتاعه وهو الجنايني وكاتم أسراره ودراعه اليمين والشمال وعلاقة طويلة جدًا وهو جزء من تاريخه الأستاذ محمد عبدالعظيم، وبنسبة كبيرة كل أبطال الفيلم متواجدين طول الوقت في نفس المشاهد بصراعاتهم وحياتهم اليومية.

ما سر تسمية فيلم الخميس اللي جاي بهذا الاسم؟

هتصدقيني لو قولت لك معرفش أنا كنت بقول دائمًا كنا سمناه الجمعة حتى الجمعة إجازة، بس الخميس اللي جاي ده الناس هتعرف إيه هو الخميس اللي جاي وغالبًا مطلوب من الجمهور أنه يجاوب عليه ويعرفوا الإجابة وهو له مغزى بس عشان محرقش الفيلم.

ما رأيك في تجربة الذكاء الاصطناعي في الفن؟ وهل تشكل خطرًا على وجود الفنانين؟

أعتقد ده مش رأيي الشخصي بس في الولايات المتحدة الأمريكية الفنانين عملوا هناك وقفة ورفضه تجربة الذكاء الاصطناعي يمكن لأسباب كتير أوي، العلاقة بين المشاهد والحاجة اللي بيتفرج عليها لو مكنش في رابط إنساني بيربطهم أو وأنت قاعد بتتفرج تحس أنك مريت بالحالة دي الحتة الإنسانية دي لو حصل لو الذكاء الاصطناعي تطور كويس أوي على مستوى الاختراعات والأبحاث الجديدة اللي العالم بيشهدها حاجة كويسة جدًا وتطور مفيد في مجالات تانية لكن الفن عمومًا حالة إنسانية حتى لو لوحة الفنان رسمها بمشاعره وإخلاصه وبإيده إحساسها الصادق هيوصلنا الفن حالة إنسانية لو تدخل فيها الذكاء هيقللها.

ما أبرز المحطات في مشوارك الفني لا تنساها؟

في محطات في مشواري الحمدلله بدايةً من مسلسل الدالي مع المرحوم الأستاذ نور الشريف، وسلسال الدم مع الأستاذة عبلة كامل الكبير أوي مع الفنان أحمد مكي، في محطات مبتتنساش ومسلسل الجماعة مع المرحوم وحيد حامد والمخرج محمد ياسين في محطات كده مهمة في حياتك لأنك بتبقى عارفة أنتي بذلتي مجهود في إيه والفكر فيه قد إيه وكنتي فرحانة قد إيه.

حدثنا عن تجربتك في مسلسل الكبير أوي مع أحمد مكي؟

لما تم اختياري في الكبير أوي عشان أعمل مأمور المزاريطة كنت مبسوط حتى على الأقل هشارك في هذا العمل لأن أنا شايف عمل تاريخي الكبير أوي من أنجح الأعمال التاريخي اللي اتعملت في الكوميديا وأن أكون جزء منه ده بالنسبة لي حاجة كويسة.

من وجهة نظرك.. هل من حق الجمهور أن يهاجم الفنانين بسبب أداءهم في بعض الأعمال؟

أي عمل فني أنت كممثل بتقدمه الأداء جده نتفق أو نختلف عليه مفيش فيها جدال أصبت بنصفق لك ونبارك لك محصلش توفيق بنقولك مرة الجاية تبقى أحسن وخلينا نتفق أن العمل الفني مادام خرج وأتعرض من حق الجمهور ينتقدوا لكن النقد لما يكون نقد موضوعي قايم على أسس يعنير أنا أنتقد أدائك في عمل عشان أقول الأسباب ميبقاش تطاول وعنيف ده المطلوب لأن إحنا في الآخر مش عشان أنا فنان أو شغال في المهنة لا ممكن خلينا نتفق أننا في محل أكل وقدم أكله معيمة ممكن أقول والله أنا مش عاجبني فيه كذا لكن متحولش الموضوع لهجوم أو أننا نحارب بعض بآرائنا أنا هسمعك لو نقدك بناء أو تحليلي.

لكن احكم ده لما بيكون نقد بناء حتى يفيدني أنا كفنان لما يكون عندك عين مشاهد جيدة وتقولي أنت ما أصبتش في ده وممكن تعمله بطريقة تانية أنا هشكرك جدًا على نقدك البناء ده وهعمل حسابي واشتغل على نفسي في المنطقة اللي قولت لي عليها اللي كان فيها القصور عندي لأن الآراء مش هدامة وإيجابية وبنكون مبسوطين، وفي الآخر أحنا كمجتمع لو اتعودنا نقول لبعض شكرًا حاجات كتير هتتغير

هل تعرضت للهجوم من قبل بسبب أحد أعمالك الفنية؟

حصل موقف فعليًا في مسلسل نجيب الريحاني مع أستاذ عمرو عبدالجليل ومن أول يوم في عرض المسلسل لاقيته بعت لي في الأوضة وقالي شوف الناس بتقول إيه، ولما شوفت المكتوب صعب عليا أوي مجهودنا كل ده بيروح عشان بننقد من غير ما نشوف العمل قالي هتعمل إيه قولت له من حق الناس أنها تنتقد وتشوف العمل كويس او مش كويس كل واحد عنده أسبابه انت قدمت العمل خلاص والمشاهد دوره أنه يحكم عليه.

وجه كلمة أخيرة لجمهور فيلم الخميس اللي جاي؟

إن شاء الله الخميس اللي جاي يعجبكم وهو مختلف شوية والكوميديا مختلفة شوية ماشوفهوش بقالنا فترة ويارب يعجبكم ومنتظرين نسمع آرائكم.