إلهام شاهين: اتعرضت للموت كتير وكانت نهايتي هتبقى على ايد نور الشريف

فجرت الفنانة المصرية إلهام شاهين عدة تصريحات عن كواليس عملها مع الفنان الراحل نور الشريف وتعرضها للموت ومظاهرة الإخوان ضدها، وذلك خلال ندوتها المقامة ضمن فعاليات مهرجان الإسكندرية السينمائي لدول البحر المتوسط.

تحيا مصر يرصد تصريحات إلهام شاهين خلال ندوتها المقامة ضمن فعاليات مهرجان الإسكندرية السينمائي لدول البحر المتوسط.

تصريحات إلهام شاهين

وقالت شاهين: كنت هموت على إيد نور الشريف في مسرحية كاليجولا، مهنتنا صعبة أوي بجد، أنا اتعرضت للحرق والغرق واتقلبت بيا عربيات في أعمالي، اتعرضت للموت كتير أوي.  

ندوة إلهام شاهين ضمن فعاليات مهرجان الإسكندرية

وتابعت: ساعة الحرق شعري اتحرق بجد، ومفيش علينا تأمين ولا أي حاجة، كنت بصور في فيلم مع نور الشريف وحطوا جاز بالغلط في الطرحة اللي على شعري، ولما بدأوا يصوروا فجأة لقيت النار في شعري، وواحد من الناس اللي المفروض يدخلوا الأوضة في المشهد شد الطرحة والضفاير اللي متركبة عشان يلحقني ويا عيني النار مسكت فيه.

واستطردت: كان فيه بتاع المطافي موجود معانا في المشهد ولما سألوه ليه مطفتهاش قالهم بلغوني إني أتدخل لو حصل حاجة للديكور لأننا كنا بنصور في مبنى التليفزيون.. يعني لو لبست النار في فنانة عادي لكن لو في ستارة هيتدخل، وحلقت شعري وفضلت سنة بلبس باروكات.

مظاهرة الإخوان ضد إلهام شاهين 

وعن الإخوان قالت: كنت في يوم رايحة الكنيسة، ولكن العربية اتعطلت مع إنها جديدة، والطريق كان طويل لمكان الكنيسة ووصلت متأخر، ولما وصلت وجيت اعتذر قالولي الحمد لله إنك اتاخرتي، وكانوا فاكريني اتأخرت قاصده بسبب اللي حصل.

وواصلت: اكتشفت إن الإخوان كانوا عاملين مظاهرة ضد إلهام شاهين قدام الكنيسة، ولما اتقبض عليهم أنا كنت وصلت، فالقدر أنقذني.