يسرا تحيي ذكرى رحيل هشام سليم الأولى: الدنيا فضيت علينا من بعدك

حرصت النجمة الكبيرة يسرا على إحياء الذكرى الأولى لوفاة الفنان هشام سليم شقيق زوجها بعد معاناة مع مرض السرطان.

تحيا مصر يرصد إحياء يسرا لذكرى هشام سليم.

إحياء يسرا لذكرى هشام سليم

ونشرت يسرا مقطع فيديو لإحياء عدد من النجوم ذكراه، عبر حسابها الرسمي على موقع تبادل الصور والفيديوهات القصيرة انستجرام، وعلقت يسرا على الفيديو، قائلة: وحشتنا ومفتقدينك أوي أوي يا هيشو.. كل حاجة بيننا كانت أحلى وأسعد الذكريات.. الدنيا فضيت علينا من بعدك بس سيرتك الحلوة مكملة معانا.. وحشتنا أوي يا أغلى الناس، ربنا يرحمك ويهنيك بالجنة ونعيمها.. فضلا وليس أمرًا برجاء قراءة الفاتحة والدعاء لهشام سليم.

يسرا تفتقد هشام سليم 

وقالت: واحشني.. قطعت بيا يا هيشو أنا عارفه إنك في مكان أحسن.. بس قاطع بيننا قطعة سوداء.. وحشتني وعايزة أحضنك وأبوسك وأضحك.. على فكرة أنا خليت حد يحجلك السنة دي وإن شاء الله ربنا يتقبلها.. أنا عارفة إنك حجيت قبل كده بس قولت أعملك هدية صغيرة أنا بحبك أوي أوي أوي.

تصريحات يسرا

هذا وكانت قالت يسرا خلال لقائها ببرنامج ab talks: الناس بتحكم على الفنان 24 ساعة وبيطلعونا شياطين على السوشيال ميديا ويصححوا أفعالنا، والجمهور بيغزو حياتنا لدرجة إني بتعب ومبقدرش أبتسم أحيانًا؛ لأننا عندنا ضغوطات ومش سعداء دايمًا، وقبل السوشيال ميديا مكنش حد بينتقد فنانة عشان لبست بيكيني وكان عندنا حرية وخصوصية.

وتابعت: إحنا كنا أسعد وعندنا حرية ووقت خاص لينا ومحدش بيقتحم خصوصيتنا قبل ظهور السوشيال ميديا، ومكنش حد بيحكم علينا وبقينا نتعرض لانتقاد أكتر حاليًا، عكس من 40 سنة وبدأت أعاني من السوشيال ميديا، لدرجة الناس بيصورونا وإحنا بناكل وينشروها على السوشيال ميديا، ليه بتصورونا وإحنا بناكل؟ سيبونا في حالنا ليه بتقتحم خصوصيتي كدا؟

وأضافت: فيه اللي بيقتص الكلام وياخد كلمتين ملهمش علاقة باللي بقوله وينشرهم، ودا ميصحش على الأقل بالنسبة لآداب السلوك والأخلاقيات ودي ملهاش علاقة الشخص متعلم ولا لا، ولكنها الطبيعة الإنسانية، مثلا لو لقيت شخص أكبر مني سنًا ومش لاقي مكان يقعد هقف له لأني اتعلمت دا في المدرسة.

واختتمت يسرا حديثها، قائلة: في النهاية أنا اخترت الشهرة ولازم أتحمل عيوبها ومينفعش ألوم حد؛ لأني بحب اللي بعمله وبحترمه وأنا مدينة للناس اللي بيحبوني ولكن بقول لهم سيبولي وقت عشان أقدر أكمل والمفروض يكون فيه تقدير للخصوصية أكتر زي ما أنا بقدر حبهم.