بشرى: بشكر طارق الشناوي على الدعاية المجانية اللي عملها لأولاد حريم كريم.. وضحكنا لما سمعنا كلامه

علقت الفنانة بشرى على انتقاد الناقد الفني طارق الشناوي لفيلم أولاد حريم كريم، ووصفه لبطلات العمل بـ “غير مطلوبين سينمائيًا”.

تحيا مصر يرصد تفاصيل تصريحات بشرى في برنامج أسرار النجوم

بشرى: بشكر طارق الشناوي على الدعاية المجانية اللي عملها لأولاد حريم كريم

وقالت بشرى خلال لقاء لها ببرنامج أسرار النجوم مع الإعلامية إنجي علي: هو رأي شخص واحد فقط، وعايزة أوجه التحية للناقد الكبير طارق الشناوي على الدعاية المجانية للفيلم، وفي رأيي سواء طارق الشناوي أو مصطفى قمر جانبهما الصواب في الفعل ورد الفعل، ولكن البادي أظلم.

وتابعت: ومفكرتش في الكلام مع الناقد طارق الشناوي، أنا ديموقراطية وهو حر في رأيه الذي يمثله هو ولا يمثل الفيلم، وخصوصا أنه متكلمش عن العمل أصلا، وما زلت أحترم رأيه وأقول يمكن الفيلم مش ذوقه، ولكن فيه خط فاصل ما بين النقد والتنمر، وخصوصا لما تكلم سيدات ولازم تراعي ما تقوله عن الستات، وليه تقول عليهم راحت عليهم وقدموا؟ هل معنى دا أن يتم دفننا، اللي اتقال عيب.

رأي طارق الشناوي في فيلم أولاد حريم كريم

وسبق وأن كشف الناقد الفني طارق الشناوي عن رأيه في فيلم أولاد حريم كريم، الذي يعرض حاليًا بدور العرض السينمائية ضمن أفلام موسم الصيف.

وقال طارق الشناوي خلال لقاء له ببرنامج ET بالعربي: من أسوأ الأفلام، علي إدريس مخرج مهم وزينب عزيز كاتبة مهمة، أنما اللي عملوه مش بس ملوش علاقة بالجزء الأول، دا ملوش علاقة بفن السينما اللي احنا بنعيشه دلوقتي، دا تراجع لزمن ما قبل الجزء الأول.

طارق الشناوي: مصطفى قمرعايش على الزمن القديم

وتابع: ومشكلة مصطفى قمر أنه عايش على الزمن القديم، ولما بتفشل كمطرب مش هتصعدك السينما، ومصطفى في عز فشله كمطرب قرر أنه يعمل فيلم، مع ناس مش مطلوبين أوي في السينما والوحيدة اللي كان ليها اسم ياسمين عبد العزيز عشان كدا هي الوحيدة اللي قالت لا.

واضاف: الكتابة في الفيلم قديمة أوي والتفاصيل دي مبقتش تجيب وتضحك ف الفيلم افتقد الضحك، ومصطفى افتقد الوهج، وساعة فيلم البطل كان ممثل وعنده حضور، لكن فقد كل دا.