بعد أزمة سارة زكريا.. أورتيجا لـتحيا مصر: اللي يجي مصر يجي باحترامه عشان يكمل باحترامه

حرص مطرب المهرجانات الشعبية أورتيجا على التعليق على أزمة المطربة سارة زكريا في مصر بعد قيامها بالتلفظ بأقوال خارجة في إحدى حفلاتها في الساحل الشمالي، ما أدى إلى تحويلها للتحقيق.

تحيا مصر يرصد في ذلك التقرير تعليق أورتيجا على أزمة سارة زكريا في مصر

أورتيجا لـ سارة زكريا: لو هتيجي مصر تيجي باحترامك

وقال أورتيجا خلال لقائه بموقع تحيا مصر: مصر بتفتح أبوابها لكل الناس فاللي يدخل مصر لازم يعرف إنها محطة لأي فنان انه ينجح واللي عايز يجي يجي باحترامه عشان يكمل باحترامه.

وتابع حديثه، قائلا: مصر بلد الفن المفروض تحترمها.

أورتيجا عن تعاونه مع أوكا: لما ربنا يريد

وعن تعاونه مع صديقه مطرب المهرجانات أوكا، قال أورتيجا: لما ربنا يريد إحنا مش متخانقين ولا حاجة الشغل حاجة والأخوية حاجة تانية خالص والناس فاكرة إننا متخانقين عشان كانوا دايما شايفين إن أوكا وأورتيجا شخص واحد.

 وبشأن أعماله الفنية المقبلة، قال أورتيجا: بعمل أغينة خليك في نفسك بنصورها برة مصر وهتنزل قريب، احنا اول ناس اتشافنا في أغاني المهرجانات  واحنا دخلنا الراب في المهرجان .

أورتيجا يوجه نصيحة لمطربي المهرجانات

وتحدث أورتيجا أيضا عن مطربي المهرجانات في الأونة الأخيرة، فقال: الفنان الصح هو اللي بيتارجيت المزيكا لكن في ناس هدفها التجارة فبتضطر تقول الكلام اللي بيوصل للناس بسرعة حتى لو شتيمة عشان يقفش فلوس.

وتابع حديثه: وأنا مع قرار النقابة انها تمضي ناس وتعهدات عشان الكلام ده.

واختتم موجها نصيحة لهم: أنصحهم أنهم يتكلموا في حاجات في الواقع ويترقص بس يكون كلام واقعي ودمه خفيف وفيه رسالة.

أزمة سارة زكريا 

وكان سارة زكريا قد أثارت الجدل في الأيام الماضية وذلك بعد جدل حفلها الغنائي في الساحل الشمالي، والتي أحيته رفقة مطرب المهرجانات الشعبية حسن شاكوش وقامت به بالتصريح بألفاظ خارجة وخادشة للحياء، واتخذت نقابة المهن الموسيقية بـ رئاسة الفنان مصطفى كامل قرارات سريعة وحازمة بعد الجدل الذي أثير حول سارة زكريا وذلك بإيقافها عن العمل وإحالتها للتحقيق فورا.