نيللي كريم عن فيلم ع الزيرو: كنت ضيفة شرف.. وحصل اختلاف وجهات نظر

علقت الفنانة نيللي كريم على أنباء خلافها مع فريق عمل فيلم ع الزيرو، وذلك  خلال لقاء لها ببرنامج الراديو بيضحك مع الإعلامية فاطمة مصطفى.

تحيا مصر يرصد تفاصيل تصريحات نيللي كريم في الراديو بيضحك

نيللي كريم: كنت ضيفة شرف في فيلم ع الزيرو

وقالت نيللي كريم: أنا معنديش أي تعليق غير أني كنت سعيدة أنا اشتغلت مع ماندو ومحمد رمضان لكن أنا بالنسبالي كورق وكدور اعتبروني طلعت ضيفة شرف في الفيلم، وهو فيلم لمحمد رمضان وللطفل.

وتابعت: أنا معنديش مشاكل مع حد لكن عندي اختلافات في وجهات النظر كممثلة، وفي شركات الإنتاج معندناش حتة إدارة الممثل، بيبقى بالمشروع، لكن محدش قلبه على الممثل ازاي اطلعه بأحسن شكل.

حقيقة خلاف نيللي كريم مع فريق عمل فيلم ع الزيرو

وسبق وأن نفى المخرج ماندو العدل كل ما تردد حول وقوع خلاف بين النجمة نيللي كريم وفريق عمل فيلم ع الزيرو بسبب مكان وحجم صورتها على بوستر العمل.

وقال ماندو العدل خلال لقائه اليوم ببرنامج الراديو بيضحك مع الإعلامية فاطمة مصطفى: أنا معنديش أي معلومة عن حاجة من الحاجات دي، أنا كل اللي أعرفه أن نيللي كريم صورت الفيلم وهو عاجبها وحباه، وكانت مبسوطة جدا بالدور وخلصت أخر يوم تصوير وهي بتشكرنا على الفيلم، والمعلومة اللي عندي بحكم قرب علاقتي بنيللي أنها مسافرة.

وتابع: وأنها مخدتش إجازة بقالها فترة طويلة جدا، كانت بتعمل مسلسل شهر رمضان، وكان عندها مسلسلات قصيرة، فلحمت أعمال كتير في بعض، وأنا مسمعتش خالص أنها زعلانة أو أنها متفقة أن شكلها في الأفيش يبقى بشكل معين ومحصلش، ولو كان فيه اتفاق على أي حاجة كان أكيد هيتعمل.

تصريحات مدحت العدل عن نيللي كريم

وعلى صعيد آخر، كشف السيناريست مدحت العدل عن السبب وراء عدم حضور النجمة نيللي كريم العرض الخاص لفيلم ع الزيرو، وذلك خلال لقاء له ببرنامج ET بالعربي عن فيلم ع الزيرو.

وقال مدحت العدل: نيللي في ميكونوس وأنا نفسي مكنتش هحضر العرض الخاص لأن مهرجان جرش بدأ قبل العرض الخاص وتم تأجيل ندوتي هناك عشان اعرف احضر.