ابنة أحمد راتب تكشف معاناة والدها في مهنة التمثيل: كان بيقف على المسرح ودرجة حرارته 40

كشفت لمياء ابنة الفنان الراحل أحمد راتب عن الصعوبات التي كان يواجهها والدها مع مهنة التمثيل، وذلك من خلال منشور عبر حسابها الشخصي على موقع التواصل الاجتماعي فيسبوك.

تحيا مصر يرصد تفاصيل أحدث منشورات ابنة أحمد راتب عبر فيسبوك

معاناة أحمد راتب في التمثيل

وكتبت لمياء: تصدق يا بابا أن لحد دلوقتي في ناس فاكرة أن شغلك كان سهل، أنه كان هزار ولعب وشهرة بس.. ميعرفوش إننا كان ممكن نقعد يومين منشوفكش من غير ما تكون مسافر لأنك كنت بتصور ١٨ ساعة متواصلة، ميعرفوش أنك كنت بتقف على المسرح ودرجة حرارتك ٤٠

وتابعت: ميعروفش أنك كان ممكن تنام ربع ساعة في كرافان في التصوير لحد لما المشهد يجهز، أو تقعد تستنى ٣ ساعات عشان يظبطوا إضاءة مشهد هياخد ف تصويره ساعتين وهيظهر على الشاشة ٣ دقايق، ميعرفوش أنك كنت بتلبس صوف في أغسطس وبتنزل البحر ف يناير.

ابنة أحمد راتب عن والدها: كان بيقول للمخرج يا أستاذ حتى لو أصغر منه

واضافت: ميعرفوش أن مناخيرك اتكسرت في تصوير مشهد واثرت على حياتك كلها، ميعرفوش أنك كنت بتحترم المخرج وتسمع كلامه وتقول له يا أستاذ حتى لو أصغر منك بعشرين سنة.. أنا فخورة قوي إني بنتك، أنا عمري ما هنسى تعبك وشقاك اللي كبرت عليهم، أنا عمري ما هنسى انك كنت أحن أب وإنسان ف الدنيا.

واختتمت: ربنا أنعم عليك أنك تربي بناتك التلاتة وتجوزهم وتشوف ولادهم، وبعت لك حج بيته لحد عندك (هدية من شركة السياحة لكل طاقم عمل مسلسل ام كلثوم)، لو مكنتش في الجنة بكل اللي فات دة، فا أنت ف الجنة بقلبك السليم الطيب.. بحبك قوي وهفضل ادعي لك لحد لما اجيلك.

مواقف إنسانية لـ أحمد راتب

وسبق وأن كشفت لمياء ابنة الفنان الراحل أحمد راتب عن مواقف إنسانية عديدة لوالدها، وذلك من خلال منشور عبر حسابها الشخصي على موقع التواصل الاجتماعي فيسبوك.

وكتبت لمياء أحمد راتب: اسمحوا لي أسرد لكم مواقف بسيطة نفسي الناس كلها تعرفها عن أبويا الله يرحمه.. بابا أول لما اتجوز ماما كان لسة مش معروف ومش بيشتغل بالتمثيل بشكل منتظم، كان بيروح مبنى الإذاعة يفضل قاعد من 9 الصبح لحد الليل عشان لو حد طلب أداء صوتي يعمله وياخد عليه 2 جنيه.