ماندو العدل: إلهام شاهين مكانتش مرشحة في فيلم ع الزيرو.. وهشام عاشور مش شغال بالواسطة

كشف المخرج ماندو العدل حقيقة الأقاويل المنتشرة حول اعتذار الفنانة إلهام شاهين عن المشاركة في فيلم ع الزيرو، وذلك خلال لقائه اليوم ببرنامج الراديو بيضحك مع الإعلامية فاطمة مصطفى.

تحيا مصر يرصد تفاصيل تصريحات ماندو العدل في الراديو بيضحك

وقال ماندو العدل: الفنانة إلهام شاهين مكانتش مرشحة لدور في فيلم ع الزيرو، وأنا مركز في شغلي ومركز أني أحاول، كل خطوة أبقى أحسن، ومش فاضي على أني أرد على فلان قال.

ماندو العدل: هشام عاشور مشتغلش في عملة نادرة بالواسطة

وبسؤاله عن مشاركة الفنان هشام عاشور في مسلسل عملة نادرة قال ماندو العدل: عشان هو جوز نيللي فالناس أكيد متضايقة أنه معاها في المسلسل، وكلام بقى واسطة ومش عارف ايه، أنا هشام اشتغل معايا في فيلم الملحد، وحظه أنه الفيلم متعرضش قبل المسلسل.

وتابع: وعمل مشهد وكان كويس جدا، وأنا اللي رشحته للمسلسل، وأنا مش فارق معايا الطريقة دي في التفكير، أنا فارق معايا النتيجة، لو كويس يبقى احنا اتوفقنا لو لقدر الله طلع مش كويس يبقى احنا متوفقناش، وهو مش شغال عشان هو جوز نيللي.

ماندو العدل: كنت متوقع أن فيلم البدلة يفشل

وفي الحلقة ذاتها، أكد المخرج ماندو العدل على أنه كان متخوفًا من تجربة فيلم البدلة من البداية، نظرًا لقلة خبرته في نوعية الأفلام الكوميدي حينها.

وقال ماندو العدل: الفيلم دا أنا كنت لسه بتكلم عليه من فترة وكنت بقول أنه لما جالي كنت مستغرب هو ليه جالي، يعني أنا كنت أيامها بعمل نوعية أفلام ونوعية مسلسلات ملهاش علاقة خالص بكوميدي، وأنا بعمله كنت خايف جدا، ومكنتش متأكد أني هعرف أعمل نوع الفيلم الكوميدي، وكنت متوقع أنه هيفشل.

وعن إمكانية تقديم جزء ثانٍ من العمل قال ماندو العدل: من أيامها دي فكرة متاحة، واحنا قافلين الفيلم بشكل يديكي احساس انه ليه جزء تاني إنما لغاية دلوقتي مفيش حاجة على الأرض وكله كلام.

واضاف: محمد هنيدي كان المرشح الأول لدور أكرم حسني، وقعدنا معاه أنا وبهجت قمر لكن بعد كدا محصلش اتفاق بين محمد هنيدي والمنتج، فغيرنا شوية في السيناريو لأنه كان المفروض خاله أكبر منه في السن، وبعدين رشحنا أكرم، وكانت بالنسباله انطلاقته الحقيقية.