علاء مرسي: أنا عندي موهبة غير عادية ولكن محتاج لتسويقها ونفسي اعمل شخصية الجوكر

حل الفنان علاء مرسي ضيف على برنامج أسرار النجوم، والذي تقدمه الإعلامية انجي علي على راديو نجوم إف أم، وصرح من خلاله عدد من التصريحات الجريئة، ويرصد تحيا مصر أبرزها في ذلك التقرير.

علاء مرسي: مش بشتغل عشان فلوس أو نجومية

تحدث علاء مرسي عن حبه للتمثيل، فقال: أنا بحب أشتغل الشغلانة دي، مش عشان النجومية أو الفلوس، أنا في نعمة غير عادية وراجل مستور الحمد لله، وأنا واثق من الموهبة اللي ربنا ادهالي، وأنا دايما بقول أنا عندي موهبة غير عادية، وبالتأكيد ربنا هيسألني عنها وازاي أفدت مجتمعي بيها، ولكني قصرت في موهبتي وكيفية إدارتها، وأنا أحتاج لتسويقها ودا مش بعرف أعمله.

علاء مرسي: نفسي أعمل شخصية الجوكر وعملته مرتين كسروا الدنيا

وتابع حديثه: نفسي أعمل شخصية الجوكر، ودا حلمي، وعملته في مشهدين في تجربة مع المخرج أحمد الجندي كسروا الدنيا، وفيه صفحات على فيسبوك أخذوا اللقطات وعملوا تقييمات بيني وبين ممثلين تانيين قدموا الشخصية، وجبت تقييم 80%، بعد كدا بدأت أدور عن شخصية الجوكر ودوافعه النفسية اللي وصلته للمرحلة دي، لأن التمثيل علم لازم أبقى متطور فيه، ولقيت اسمي مذكور ضمن الممثلين اللي قدموا التجربة دي، وبالفعل سعيت أني أكتب سيناريو بالتعاون مع شباب كتاب عشان أوصل لفكرهم، ومؤمن إن لكل زمن رؤيته وفكره، وللأسف من سنتين عرضت الفكرة على مخرجين كتير ومفيش حد تحمس.

علاء مرسي: هنيدي بيفتح مساحة لممثل لسة طالع ومريت بفترات احباط

وتطرق مرسي بحديثه عن محمد هنيدي، فقال: هنيدي من القلائل اللي بيفتح مساحة غير عادية لممثل لسه بيطلع، وبيقف في المشهد ويفكر إزاي يخليه يطلع بشكل متميز.. لازم أشكر هنيدي على الكلام اللي قاله عليا في أحد البرامج مؤخرا، لأن المذيعة قالت له إن علاء مرسي اشتكى منك كذا مرة في برامج تانية، ولكن دا مش حقيقي حقيقي، وهنيدي اتصدم من كلامها، وقال عني كلام عظيم ويكفيني إنه يكون أخويا وصديق عمري، وبيننا صداقة وعشرة ومهما اتكلمنا فيها محدش هيفهمها، وعلاقتي بهنيدي أعمق في الرؤية بعلاقتي من أهل بيتي لأني أعرفه قبل معرفتهم، وهو في البرنامج دا رد بشكل خلاني أفتخر بصداقتي ليه.

واختتم حديثه بمواقفه المأسوية فأكد: مريت بفترات إحباط قبل كدا وسيبت الشغلانة شوية بعد كدا روحت للكويت والسعودية وأخرجت مسرحيات هناك، وفي سوريا بردو اشتغلت لفترة، ورجعت لمصر وفي النهاية مش هيبقالي إلا بلدي.