علاء مرسي: انا ليا جمهور على السوشيال ميديا رهيب وبكون تريند من وقت لآخر

حل الفنان علاء مرسي ضيف على برنامج أسرار النجوم، والذي تقدمه الإعلامية انجي علي على راديو نجوم إف أم، وصرح من خلاله عدد من التصريحات الجريئة الخاصة بأراءه حول السوشيال ميديا وغيرها.

تحيا مصر يرصد في ذلك التقرير تصريحات علاء مرسي عن السوشيال ميديا ومصطلح تريند

علاء مرسي: الناس بتشوف الفنان من ورا الزجاج وبقى كل واحد ناقد من ورا الموبايل

وقال علاء مرسي خلال البرنامج: أحيانا الناس بتشوف الفنان من ورا الازاز، يعني ممكن المشاهد يشوف دور شر للفنان وياخذ الانطباع دا عنه وكأنه فعلا شرير وبقى بالتالي متحفز ليه، ولكن الفنان دا نجح في تقديم دوره بس، وعشان كدا دور الإعلام مهم في إظهار الجانب التاني والإنساني للممثل

وتابع حديثه، قائلا: السوشيال ميديا هو عالم افتراضي وبقى كل شخص يعمل من وراء الموبيل الخاص بيه ناقد وتلاقي فتاوى في الدين والرياضة وكل حاجة، ولكن الكل لازم يعرف أن الكلمة مسؤولية، وأنت متعرفش خطورة الكلمة أو التعليق اللي بتكتبه لفنان، ولقيت في مرة من المرات شخص كاتب لفنان تعليق على صورة (إيه ده أنت لسه عايش!) وهي كلمة وجعتني جدا.

علاء مرسي: أنا ليا جمهور كبير على السوشيال ميديا

وأكد: أنا ليا جمهور على السوشيال ميديا رهيب، وأنا باكون تريند من وقت لآخر رغم أني مش نشط على هذا العالم، ولكن دا نابع من أعمالي والكوميكس اللي بتتعمل على صوري، وصفحاتي تم توثيقها مؤخرا لوحدها من غير أي مجهود مني أو سعي خاص.

واستكمل حديثه: للأسف الناس بقت تلهث ورا التريند عشان بس الظهور، والفنان مهنة زي النجار والمحامي والطبيب، ولكن هي مهنة ليها ضريبة أنها عامة وأنا كفنان بدفع الضريبة دي في إنك متقدرش تاخد عايلتك وتنزل مثلا لمنطقة وسط البلد، لأنك هتدفع تمنها ناس عايزة تتصور معاك أو شخص يشدك بالعافية، وللأسف بسبب السوشيال ميديا قيم كتيرة بركتها قلت، منها الحياء.

علاء مرسي: بقت عبارة انا حر متصدرة المشهد

واختتم: بقت عبارة (أنا حر) متصدرة المشهد، وفيه كلمات تم تصديرها مع جيل الألفية الحالي، وهي جمل بدأت تكبر لغاية ما بقت واقع، وكل شخص في الأسرة قام ببناء لنفسه عالم افتراضي، ثم بدأت السوشيال ميديا تتحول لتجارة والبحث من خلالها على أموال كتيرة من غير أي عناء، عشان كدا معدش فيه مساحة الاحترام.