أحمد الزواوي عن فيفي عبده: عجزتها زي ما عجزتني ولو طولت أموتها ايه المشكلة

فجر المنتج أحمد الزواوي، عدة تصريحات حول خلافه مع الفنانة فيفي عبده منذ عام 2017، وذلك خلال حواره مع الإعلامية مروة صبري، في برنامجها قعدة ستات المذاع عبر شاشة قناة “القاهرة اليوم”.

تحيا مصر يرصد تصريحات أحمد الزواوي. 

تصريحات أحمد الزواوي

وقال: والله العظيم اللي فيفي فيه بسببي، أنا طلبت حقي بالقانون وبالأصول، وأذيتها زي ما هي أذتني، ولو طولت أموتها هموتها إيه المشكلة؟ مش هي أذتني؟ لو افترضنا أن النص مليون جنيه في 2017، كان كل ما أملك أو تحويشة العمر، وضاع مني يبقى مش مستقبلي ضاع؟ يعني هي تضيع مستقبلي وأنا مأذيهاش؟.

وتابع: في الناس بتقتل أنا مقتلتش، أنا بتعامل بالقانون الإلهي، الجزاء من جنس العمل، وعجزتها زي ما عجزتني، والنهاردة في أجزاء في جسمها مبتتحركش، بكرا في أجزاء بتتحرك هتقف.

أزمة فيفي عبده وأحمد الزواوي

وأضاف: فيفي عبده محدش هيحس باللي فيها إلا هي، وهي عارفة جالها إزاي.. يعني هي تروح تتكرم في لبنان وهي واكلة حق الناس؟ أنا أسيبها برضو تتكرم؟ ده عدل ربنا بيقول كده؟ يعني الشكل اللي بتديه للناس وهي واكلة الناس؟

فردت عليه الإعلامية مروة صبري قائلة: عدل ربنا مقالش أننا نأذي بعض، وليه محاولتش تتواصل معاها بطريقة تانية؟، يعني أنت من 2017 معرفتش تكلمها في التليفون؟.

وتابعت مروة صبري مناشدة الفنانة فيفي عبده، قائلة: رجاء من الفنانة فيفي عبده تردي على المنتج أحمد الزواوي، اللي بيقول أنه هو عنده قوة خارقة وأذاكي ولسة هيأذيكي تاني، وعملك عمل، رجاء اطلعي ردي.

لقاء فيفي عبده في et بالعربي

وكانت قالت فيفي عبده في لقاءها مع إي تي بالعربي: لأول مرة بقول لجمهوري ارحموني الناس كلها بتحبني، لكن أنا ممكن أحسد نفسي والحسد موجودة ولكن زاد عن حده معايا، ومش عاوزة أضعف وأقول لهم أني محسودة لأني مش عاوز العطف وأنا دايما واقفة زي الأسد برقص ومبسوطة وبسمع المزيكا، ومش عاوزة اكئب الناس لأن الناس دي بتصحى من النوم تشوف صفحتي ويشوفوا عاملة إيه.

وتابعت: الغضروف قفل على العصب وما بقاش العصب يتحرك ورجلي بقيت تقيلة، وربنا يتم شفائي لأن الصحة التاج ولو مال الدنيا معاك لو مفيش صحة يبقى أنت مش معاك حاجة.

تفاصيل أزمة فيفي عبده الصحية 
وأضافت: دوروا على عروق في إيدي مالقوش ولما عملوا ليا فحص لقوا القلب فيه رفة، وطبلوا على الهواء دكتور قلب وخدت بنج وعملوا ليا منظار علشان يطمنوا على القلب ولما اطمنوا كانوا مجهزين اوضة العمليات بتاعة العمود الفقري، ولما سافرت علشان اتكرم فوجئت وأنا بحط رجلي على السلم لقيت رجلي تقيلة ودي كانت بالنسبة ليا مفاجأة قدام الناس وما كنتش قادرة أطلع علشان اتكرم.

فيفي عبده تخضع لعملية جراحية
واستطردت: وأنا داخلة أعمل العملية قلت لربنا لو قمت كويسة لازم أروح حتى على كرسي، فجأة لقيت الغضروف قفل على العصب وما بقاش العصب يتحرك ورجلي بقيت تقيلة، وربنا يتم شفائي لأن الصحة التاج ولو مال الدنيا معاك لو مفيش صحة يبقى أنت مش معاك حاجة.