رحاب الجمل: اتصالحت أنا وباسم سمرة.. ومعنديش مشكلة اشتغل معاه في مشاهد مشتركة

كشفت الفنانة رحاب الجمل عن إمكانية تعاونها مع الفنان باسم سمرة، بعد وقوع خلاف بينهما في الفترة الأخيرة، وذلك خلال لقاء لها ببرنامج الستات، مع الإعلامية مفيدة، والإعلامية سهير جودة، على شاشة تلفزيون قناة النهار.

تحيا مصر يرصد تفاصيل تصريحات رحاب الجمل عن باسم سمرة

خلاف رحاب الجمل وباسم سمرة

وقالت رحاب الجمل: اتصالحنا أنا وباسم سمرة، والأزمة اللي كانت بينا انتهت وعدت خلاص، والموضوع كان زعل وسوء تفاهم بس مش واصل لدرجة السواد ومش حب وكره.. اشتغلنا أنا وباسم سمرة مع بعض، واَخرها كان فيلم البعبع، ومعنديش مشكلة اشتغل معاه في مشاهد مشتركة.

وتابعت: أنا قلت نصايحي لباسم سمرة واتعلمت إني ابقى لحالي ومزعلش علشان حد لإني بكتسف أن صاحب الموضوع نفسه مش زعلان علشان نفسه.

تصريحات رحاب الجمل عن فيلم مستر إكس

وسبق وأن كشفت الفنانة رحاب الجمل عن كواليس فيلم مستر إكس بطولة الفنان أحمد فهمي، الذي انطلق عرضه في موسم عيد الأضحى المنقضي.

وقالت رحاب الجمل خلال مداخلة هاتفية في برنامج كلاكيت عبر إذاعة نجوم إف إم: يارب يكون تعبنا وحبنا للفيلم وصل للجمهور ولكل اللي شافوا الفيلم، فرحانة لما بدخل على السوشيال ميديا عموما ردود الأفعال مبهرة والناس مبسوطة بالفيلم والناس بتقول إن الفيلم صيفي وأحلى مما توقعوا وشبابي.

وتابعت: عملنا مجهود رهيب وإحنا شغالين، وفيه سنة وشوية قبل التصوير أحمد فهمي والمخرج الجميل أحمد عبد الوهاب وأمجد الشرقاوي اشتغلوا فيها على الورق، وأنا كنت متحمسة جدا؛ لأنها تاني تجربة ليا مع النجم الفنان الإنسان أحمد فهمي مش عارفه أقول إيه لساني بيعجز إنه يوفيه حقه بجد، من أجمل الناس اللي اشتغلت معاهم أخلاقيًا وفنيًا بيحبنا كلنا ومهتم بينا كلنا وفرحان بينا كلنا.