والد ريم طارق: حسن شاكوش بيهددنا.. واللي ربنا يستره مينفعش احنا نفضحه

حرص والد ريم طارق، طليقة المطرب الشعبي حسن شاكوش، التعليق على أزمة ابنته مع طليقها، موضحًا مطالبه التي يتمنى تنفيذها لحفظ حق نجلته.

تحيا مصر يرصد تفاصيل تصريحات والد ريم طارق

تصريحات والد ريم طارق

وقال والد ريم طارق في مداخلة هاتفية له ببرنامج 90 دقيقة مع الإعلامية بسمة وهبة: أنا مش حابب اتكلم في أي حاجة، أنا بنتي اتظلمت ظلم كبير، ودايما بتهدد، من أول المشكلة بيجيلي تهديدات غير عادية، وطلعت استنجدت، وقولت يا جماعة الراجل دا يعرف يعمل ويعمل، ومش هقول سبب الطلاق لأن احنا اتعودنا منجبش في سيرة حد ومنفتش أسرار حد، واللي ربنا يستره مينفعش احنا نفضحه.

وتابع: وأنا عايز أوجهله رسالة أنت جيت خدت بنتي من بيتي، وبنتي كانت متعززة في بيت أبوها ومبسوطة، رجعتهالي أبسط ما يقال عنها أنها كانت جثة مهلهلة مطعونة في كرامتها، الله يسامحك على كل اللي أنت عملته، والحرب دي استنزفت كل قوانا لكن احنا مكملين، واخواته بيشتمونا.

والد ريم طارق: أنا عايز اعتذار من حسن شاكوش

واستكمل والد ريم طارق: أنا عايز اعتذار من حسن شاكوش على كل الكلام اللي قاله هو وأهله، وأنا بوعده مقابل الاعتذار أني مش هتكلم ولا هقول ايه السبب اللي خلاني أنا وبنتي منقعدش مع حد عشان تصالح وكلام من دا، واللي أنا عايزه هدوم بنتي، وأنا ولا عايز منه أبيض ولا أسود.

واختتم: أخو حسن شاكوش سبني وأنا عملتله قضية، أستاذ حسن اتهمني أنا وبنتي أن احنا زورنا وهعمله قضية تاني.

أزمة ريم طارق وحسن شاكوش

وسبق وأن كشفت ريم طارق طليقة الفنان حسن شاكوش العديد من المفاجآت بشأن زوجها مطرب المهرجانات، ووجهت له العديد من الرسائل.

وقالت ريم طارق في لايف عبر حسابها بموقع تبادل الصور والفيديوهات انستجرام: بعد ما خدت تمكين أهل حسن شاكوش تعرضولي وقالولي هتقعدي لوحدك وهنوريكي وعملت محضر بالتهديدات دي.

وتابعت: روحت بيتي الأمن قالي مينفعش تدخلي وشاكوش كلم بتوع الأمن وقالهم خلوها تطلع على القسم وتشوف حل عشان هي ملهاش حاجة عندي.