محمود عامر: دلوقتي أم سيد الدلالة بيجيبوها تمثل عشان بقيت بلوجر

كشف الفنان محمود عامر تفاصيل تقاضي “الكاستينج دايركتور” نسبة من الفنانين مقابل حصولهم على أدوار، وذلك خلال حواره مع الإعلامية إنجي هشام في برنامج المنسي عبر قناة هي.

تحيا مصر يرصد تفاصيل تصريحات محمود عامر

تصريحات محمود عامر في برنامج المنسي

وقال محمود عامر: الكاستينج دايركتور البعض منهم بياخد نفسه من فلوس الممثل لان هو فتح مكتب في غاز وكهرباء وضرايب فبيجيبك ولو جالك دور من خلاله، بياخد نسبه في ناس بتاخد ١٠ وناس بتاخد ٢٠ وناس بتاخد ٣٥ فأنتي هتحمي المهنة دي ازاي ؟.

وتابع: دلوقتي أم سيد الدلالة مع احترامي المهنه بيجيبوهالك تمثل علشان بقت بلوجر أو انفلونسر أو المسميات الجديدة اللي بيقولوها دي، دلوقت المهنه مبقتيش تعرفي تقولي تلت التلاتة كام أو مبقاش مصدر واحد هو اللي بيراعي الحكاية لا احنا داخلين حارة سد.

محمود عامر يكشف سبب قلة الفرص في التمثيل

وكشف عامر عن سبب قلة الفرص في مجال التمثيل قائلًا: سببها أن محدش فاضي، وإن حضرتك بتاخدي المسلسل مبتدخليش بالحلقات كاملة، بتخشي ٥ او٦ حلقات علشان تلحقي رمضان أو اوف سيزون، والمخرج برضو معذور معندوش كل الشخصيات الموجودين هو بيقعد مع الورشة أو المؤلف بيقولولوا محمود هيبقي كذا انجي هتبقي كذا لكن هو لسه متكتبش بس بيكون عنده خط سير وفي السكه بيطلع علي وعباس وسعدية مش معروفين طب هنجيب مين.

محمود عامر في مسلسل “أعمل ايه”

وفي وقت سابق، تحدث الفنان القدير محمود عامر عن شخصيته في مسلسل “أعمل ايه” وردود الأفعال التي تلقاها من الجمهور، وذلك خلال حوار سابق له ببرنامج “الستات ميعرفوش يكدبوا”؟

حيث قال محمود عامر: “معظم اللي بيتفرجوا على المسلسل بيبعتولي على الخاص ويقولولي أستاذ محمود هو شاهين عمل ايه وهيحصله ايه، لدرجة أن الشخصية نفسها معلقة معاهم وعايزين يعرفوا الراجل دا هيحصلوا ايه”.

وتابع محمود عامر حديثه عن شخصيته في مسلسل “أعمل ايه” قائلًا: “أنا حتى نفسي كممثل سألت طب الراجل دا ايه موقف القانون منه، هو فاضل 4 أيام ومازالوا بيتصوروا، والكل تعاطف مع الشخصية وفي الآخر القانون بيحكم”.