ياسمين غيث: بعد 9 شهور ابني رجع حضني تاني وكان زعلان ومهموم بسبب مرضي

كشفت الفنانة ياسمين غيث عن معاناتها الفترة الأخيرة وأجرائها العديد من العمليات الجراحية التي أدت إلى ابتعادها عن نجلها بسبب مرضها.

تحيا مصر يرصد لكم تصريحات ياسمين غيث

وكتبت ياسمين غيث عبر حسابها بموقع تبادل الصور والفيديوهات انستجرام: 9 شهور...يعني تقريبا ٣/٤ السنة (٢٠٢٢ علي ٢٠٢٣) كانوا أقل ما يقال عليهم عذاب...جسدي و معنوي غير العمليات و الأوجاع و الأسابيع اللي قضيتها في المستشفيات.

ياسمين غيث: بعد ابني عني كان عذاب وأكبر همي

وتابعت: كان فيه إبني...ولد عنده ١٠ سنين، مامته بتعمله ٩٠% من حاجته و بتوديه تمارينه و حصص الرسم بتاعته و و و.....لفجأه مامي نزلت راحت المستشفي و مش عارفين عندها إيه ولا هترجع إمتي...و ده كان عذاب لوحده بالنسبالي و كان أكبر همي، لدرجة إني كنت و أنا لسة بفوق من التخدير ماباقولش غير "مالك".

ياسمين غيث: ابني كان زعلان ومهموم بعد مرضي

واستكملت: الحقيقة إن الأطفال (من رحمة ربنا) بيستوعبوا كل حاجة طبعا لكن ربنا بيخلي كل حاجة تنزل عليهم برحمة و أبسط من تخيلنا...إبني كان زعلان و مهموم و كانوا صحابي مش بيسبوه و بيخرجوه طول الوقت معاهم لكن حكولي بعد كدة إنه كان بيكون برده مهموم و زعلان...لكن ربنا رحيم و بيخلي كل حاجة تعدي عليهم بطريقة أبسط.

ياسمين غيث: ابني رجع لحضني من تاني

وأضافت: رجع حضني تاني ألف حمد و شكر ليك يا رب و قدرت نعم ربنا عليا أكتر من الأول تاني (اللهم ديمها نعمة يا رب)، و الحياة تصعب عليا أكتر بأوجاع و فحوصات أعيش بيها أكتر و أكتر و لكن يبقي شئ واحد أكيد، إن ربنا خطته أحسن من ألف خطة بنحطها لنفسنا... مش هنعرف السبب و الخطة الأحسن علي طول، بس هنعرف في يوم من الأيام!

الحالة الصحية لياسمين غيث

وسبق وكشفت الفنانة ياسمين غيث إنها مازالت تتعافي من مرض السرطان، كما أنها تخضع للفحوصات بشكلي دائم للأطمئنان على حالتها الصحية، وكتبت ياسمين غيث عبر حسابها بموقع تبادل الصور والفيديوهات انستجرام: الحياة علمتني إنها صعبة، أوقات مستحيلة، متعبة، مؤلمة، و مليانة عذاب... بس كمان علمتني إني لما بركز على "الأمل"، على الإيجابية، على الحلو اللي فيها، اللي مش بندوقه غير بعد كل الوحش اللي فوق.

وتابعت:  بحاول أقف على رجلي تاني، مش سهلة، بس بحاول.. لسة عندي ألم بس مكملة.. لسة بعيط و بزعل من غير أسباب حقيقية في أوقات كتير من كتر صعوبة اللي عديت و بعدي بيه، عايشة بفحوصات كل شهر و 2 و 3 و 6  يعني طول الوقت تقريبا بس بحاول أستمتع بالحياة بينهم، عايشة بصعوبة بس ألف حمد و شكر "لسة عايشة".. بحبكم و بحاول أرجع علشانكم.