متجوزة أتنين وعندها 4 عيال.. مأساة أمل: واحد بيجيب ستات والتاني بيتحبس كل شوية | فيديو

مأساة تعرضت لها سيدة تدعى أمل، حيث تزوجت من شخص قبل سنوات وأنجبت منه نجلها الأول، إلا أنه بعد فترة قام بطردها من المنزل وأخبرها بأنه طلقها ولا يريدها، وبعد ذلك تزوجت من شخص آخر عرفيا وأنجبت منه 3 أطفال إلا أنها فوجئت بأن الأول لم يقوم بتطليقها بعد ذهابها لتجديد بطاقة الرقم القومي الخاص بها.

تحيا مصر

قابيل وهابيل بسبب الزوجات.. قصة أخ قتل شقيقه التوأم في كفر الشيخ

جريمة الأم وعشيقها.. هربت معه وحرضها على قتل إبنتها هاجر في الاسكندرية | تفاصيل مروعة

قصة أمل.. جمعت بين زوجين رسمي وعرفي

وقالت أمل لـ تحيا مصر «أنا متجوزة أتنين ومعايا منهم 4 عيال، واحد من الأول و3 من الجديد، وعيالي ملهمش شهادات ميلاد، ومش عارفة أعمل وبقيت متبهدلة وقاعدة في الشارع، ومحتاجة سكن عشان أروح أخد عيالي وأطلع لهم شهادات ميلاد وأشتغل عشان أربيهم».

وسردت أمل مأساتها قائلة «انا كنت متجوزة واحد كان مبهدلني، وكان بيخليني أنزل أشتغل بالعافية ومكنش بيشتغل وكان بيضربني وينزلني أجيب فلوس وهو قاعد وهو بياخدها يصرفها على مزاجه وكنت بدفع الإيجار وفواتير المياه والنور وبعد 4 سنين جواز طردني من البيت وقالي أنا طلقتك وملكيش حاجة عندي».

أمل: جوزي الأول قالي أنه طلقني وطلع بيكدب

وتابعت أمل «هو كان يشرب مخدرات وأنا مكنتش عارفة، ومعرفتش إلا لما طردني من البيت، ولما كنت بقعد أقوله مش قادرة أنزله أشتغل كان بيقعدني في البيت يومين وتلاتة من غير أكل، كنت بنزل أشتغل عشان أعرف أعيش، وبعد ما طردني روحت قعدت عن واحدة 4 شهور، وبعدها أتجوزت واحد عرفي عشان هي قالتلي أتجوزي عرفي عشان تعرفي تقطعي الورقة ومحدش يمسك عليكي حاجة».

وأضافت أمل «أتجوزت عرفي وأنا فاكره أني مطلقة خلاص، وخلفت أبني محمد وطلبت منه يسجله قالي الظروف مش سامحه ولما تيجي فلوس هسجله ولما كانت بتيجي فلوس كان بيروح يشتري مخدرات ويبيعها، وبعدها خلفت إبني شريف، وطلبت منه يسجله وجيت في مرة قولتله أنا عايزاك تسجل العيال، وكنت ساعتها حامل في بنتي أمنية، وهو قالي لما نشوف».

سيدة تستغيث: نفسي أسجل عيالي وأخلص من أزواجي

وأكملت أمل «جوزي العرفي كان ماشي كويس، بس كان بيتحبس كل شوية، ولما البطاقة بتاعتي أنتهت روحت أجددها كتبت في الإستمارة أني مطلقة، لقيت السجل بيقولي أنتي مش مطلقة ولسه متجوزة، ولما عرفت ده أنه مطلقنيش قولت أنا كدة جبت عيالي من الحرام وحاولت أدور على جوزي الأول لكن ملقتش عنوان ولا أي حاجة، وجوزي التاني مش عايز يسجل العيال عشان أفضل معاه».

وقالت أمل في مأساتها «جوزي العرفي كان بيضربني ويبهدلني وبيعرف ستات غيري كتير وبيجيبهم البيت وكان بينزلني، وإمبارح جاب واحدة وقالي دي مراتي قولتله دي مراتك أنا مش قاعدة وطلعت مش مراته، سبت البيت ومشيت، وكل اللي عايزاه أني أطلق من جوزي الأول والتاني وأسجل عيالي عشان أعرف أربيهم وأعالجهم وأعلمهم».