رامي جمال لـ مجهول: بقالك كتير منجحتش فتغلط في اساتذتك عشان تبقى موجود

تزامنا مع تصريحات المطرب والملحن عمرو مصطفى والتي هاجم بها عدد كبير من نجوم الفن من بينهم الفنان تامر عاشور والفنان رامي صبري وغيرهم من نجوم الطرب، خرج رامي جمال في تصريح غامض وغير مباشر.

تحيا مصر يرصد في ذلك التقرير تصريحات رامي جمال 

رامي جمال ورسالته الغامضة

وكتب رامي جمال في منشوره عبر حسابه الرسمي بموقع التواصل الإجتماعي فيسبوك: بقالك فتره منجحتش اغلط في كل زمايلك واساتذتك نرجع نستضيفك اهو اي محتوي لو مش فني يبقي اي تقليل من الكبار فيضطروا يردوا عليك ف تبقي موجود حاجات لزوم المشاهدات!.

تامر عاشور لـ عمرو مصطفى: قليت من نظر تلميذك

كان قد هاجم تامر عاشور، الملحن عمرو مصطفى، فقال: لاستعانه  بعمرو مش صعبه واشتغلنا مع بعض اغنيه "انطق" كل الحكايه انه معرفش يجاوب على السؤال "الصناعه انهارت ازاي وانت عمود من عمدان الصناعه ؟ السؤال اللي مش هتلاقي له إجابه مهما توّهت الناس اللي كلهم قالولك أنك مجاوبتش بمنتهى الوعي .. وأنا الحقيقه  كنت مُنتظر إجابتك علشان اقولك الصناعه فيها كام عمود غيرك وكام مُطرب عمل تاريخ وعلامات  من غيرك ومنهم انا وكام مُلحن وشاعر وموزع اشترك في نجاح مطربين واعلانات وتترات وكل حاجه حصلت عادي بدونك-.

واستكمل: أني احترمتك أو على حد قولك ان تامر وهو بيكلمني  "كان واقف كدهو "  طبعا احترمك واقدّرك انت استاذ كبير بس قلّيت في نَظر تلميذك لما اتكلمت في التلفزيون عن ان فيه حد عموما احترمك وكأنه حدث جلل لأستاذ كبير زيك.

رامي صبري وصراعه مع عمرو مصطفى

أما عن رامي صبري فقال في تصريحات تليفزيونية، قائلا: أنا عامل أغنية يمكن خير في سنة 2013 بعد الثورة، وهي لحد من أسبوعين كانت رقم 1 قعدت 4 شهور رقم واحد . مش رامي صبري اللي يسرق لحن ولو هو يعرفني كويس مش هيتهمني الاتهام ده وممكن يكون فيه توارد أفكار وفيه 10 ألحان ممكن يكون فيهم جملة شبه التانية، ملحن كبير زي عمرو مصطفى مينفعش يطلع يقول على فنان وملحن مش صغير ومطرب مش صغير أنه سارق أنا مكانتي مش صغيرة في الوسط. عمرو خريج كلية حقوق، وأنا خريج معهد موسيقى عربية قسم تأليف موسيقى يعني لما تيجي تتكلم عن متخصص وانت خريج حقوق يعني لازم تعرف انت بتتكلم عن مين. أنا لو مركز معاه هاحبسه بالقانون.