حنين سعيد: نادين خان وش السعد عليا.. أنا مع أي ست عايزة تتجوز تاني حتى لو جدة.. ومشكلتي أني طيبة زي ندى| حوار

حنين سعيد.. دخلت إلى قلوب الجمهور دون مقدمات، ملامحها البسيطة جذبت المشاهدين في لمح البصر، ضحكتها ضحكة مصرية خالصة، ولمعة عيناها سر قبول الناس لها، تمنى الجميع صداقتها، بعد أن شاهدوها في مسلسل ليه لأ 3، حيث جسدت دور الصديقة المقربة بصدق وإتقان، ونالت إشادات واسعة من الكثيرين.

ولذلك أجرى موقع تحيا مصر معاها حوارًا خاصًا لتكشف لنا عن تفاصيل دورها في مسلسل ليه لأ 3، وكواليس تعاونها مع المخرجة نادين خان، ورأيها في القضايا الشائكة التي يتناولها المسلسل، والكثير من الأمور الأخرى.

وإليكم نص الحوار:

في البداية.. ما الذي حمسك للمشاركة في مسلسل ليه لأ؟

أول حاجة حمستني للمشاركة في المسلسل أنه من إخراج نادين خان، ودي مكانتش أول مرة أشتغل مع أستاذة نادين، وكنت عايزة أشتغل معاها تاني، وفكرة أنها اديتني فرصة لتاني مرة أني أشتغل معاها، دا غير أن المسلسل بطولة نيللي كريم، ومن سلسلة ليه لأ، اللي كنت أصلًا بحبها وبتفرج عليها من زمان، فكنت عايزة أدخل هذه التجربة، وأكون جزء من أجزاء ليه لأ، وأجرب حاجة جديدة ومختلفة عن اللي عملتها قبل كدا.

هل هناك تشابه بينك وبين شخصية ندى ؟

شخصية ندى فيها حاجات كتيرة جدًا مختلفة عني، وفيها بردو حاجات شبهي، يعني ندى صاحبة صحابها أوي، وأنا في الحقيقة كدا جدًا، بس ندى مترقعة أكتر، وأنا عندي الطاقة دي بس مش زي ندى، مش طايشة، وندى بتحب التمثيل زيي، وهي طيبة أوي، وأنا مشكلتي أني طيبة.

حدثينا عن تجربتك مع المخرجة نادين خان.. وماذا تعلمتِ منها ؟

أنا بحب أستاذة نادين جدًا، هي شخص على المستوى الإنساني حد جميل أوي، وفي اللوكيشن بتهزر وبتضحك وبتتكلم، مفيش زعيق وشد، دايما الجو بيبقى لطيف وجميل، وهي حد ملتزم جدًا في مواعيده، وكنت بتعامل معاها بطبيعتي أوي، وكانت بتشجعني وتقولي متخافيش يالا نجرب تاني، واتعلمت منها أني أعرف ازاي يبقى فيه ست هي اللي ماسكة الدنيا كويس أوي ومنظمة واد ايه كل الناس في اللوكيشن بيحبوها.

كيف كان أول لقاء بينك وبين فريدة رجب.. وما شكل علاقتكما الآن ؟

فريدة رجب حد عسول أوي في الحقيقة، بتتكلم كتير وعندها طاقة، وأول مقابلة بيني وبينها حسيت أنها صاحبتي فعلًا، أنا ببقى خجولة شوية في حاجات بس مش في التمثيل، زي لما اتعامل مع حد جديد لأول مرة، بس فريدة كانت مرحبة جدًا وأول لما شافتني قعدنا نتكلم ونهزر، ولغاية دلوقتي أنا وفريدة صحاب جدًا، وهي حد جميل جدًا.

ما رأيك في القضايا التي يناقشها المسلسل ؟.. وهل أنتِ كحنين تقبلين بزواج شيري ؟

المسلسل بيناقش قضية مهمة جدًا وهي زواج الأم بالذات لو الأم عندها أطفال كبار، لأن دايما المجتمع بيشوف أن زواج الأب عادي، حتى لو هو اتجوز كذا مرة، ولما الموضوع يجي ناحية الست، بيقولوا أفني حياتك لعيالك، وأنا مع شيري جدًا أنها تتجوز، ومع أي ست عندها فرصة أنها تتجوز لتاني مرة حتى لو جدة وفيه شخص بتحبه محترم وكويس ليه لأ.

كيف يكون رد فعلك عند تعرضك للانتقادات على دور قدمتيه ؟

أنا مش بعرف أرد على الناس، بس طول ما الانتقاد على الدور مش عليا، أنت لو عايز تنتقد أنتقد الدور زي ما أنت عايز، أنتقد الشخصية اللي أنا عملاها بس متنتقدنيش أنا، ومتغلطش فيا أنا أو في حد من أهلي لأن دا مش صح.

وجالي تعليقات وحشة بس مش بشوفها بعديها، بس الناس مش بتاخد بالها أن التعليقات السيئة دي بتأثر في الإنسان، أنا فاكرة أنه كان فيه تعليق وحش أوي فضلت طول اليوم بفكر ليه بني آدم ياخد من وقته دقيقة عشان يكتب كومنت يضايق فيه شخص سواء حد معروف أو شخص عادي.

هل كان دخولك مجال التمثيل صدفة أم مخطط له ؟

كنت بمثل وأنا صغيرة، وكنت عايزة أدخل طب أسنان فقولت لا هركز في دراستي، وثانوية عامة، وبعد ما خلصت الثانوية العامة دخلت الجامعة وبعدها دخلت مسرح الجامعة، وكانت صدفة، وبعد كدا سيبت جامعتي وقدمت في معهد فنون مسرحية، كل حاجة جات بالصدفة بس صدفة مدبرة.

مَن من النجوم والمخرجين تتمني العمل معهم مستقبلًا ؟

نفسي أشتغل مع أستاذة كاملة أبو ذكري، لأن بدايتي لحب المهنة دي سببها أفلامها، هي أفلامها أفلام مهمة وفيها حاجات، ومصرية جدًا، وبحسها حقيقية، كمان نفسي أشتغل مع مروان حامد وعمرو سلامة وبيتر ميمي، ومريم أبو عوف.

وكمان نادين حان لأنها وش السعد عليا وأول حد أداني فرصة في مسلسل مين قال، ومن الممثلين فيه كتير، زي، ماجد الكدواني، كريم عبد العزيز، منة شلبي، منى زكي، ونفسي أشتغل معاهم كلهم.

ومثلي الأعلى في التمثيل فاتن حمامة، وبحس أنها ملهمتي في التمثيل، وهي مميزة، وأستاذة ونجمة أوي وبحبها حب مش طبيعي، وكان نفسي أمثل مع محمود عبد العزيز، وأحمد زكي.

هل هناك أعمال جديدة تحضرين لها في الفترة المقبلة ؟

في حاجة دلوقتي بحضرها في هي لسه لغاية دلوقتي غير معلنة، وأول لما الموضوع يبقى رسمي هبدأ أعلن.