تامر هجرس: الراجل الشرقي لازم يحب مراته ويفتخر بيها.. وبحب الشائعات اللي بتطلع عليا

تحدث الفنان تامر هجرس عن ملامح وتفاصيل شخصيته، خلال لقائه اليوم ببرنامج أسرار النجوم، الذي يذاع على محطة راديو نجوم إف إم، وتقدمه الإعلامية إنجي علي، كل يوم خميس على الهواء مباشرة.

تحيا مصر يرصد تفاصيل تصريحات تامر هجرس في أسرار النجوم

وقال تامر هجرس: شخصيتي المؤمنة هي اللي محتفظ بيها طول عمري، لأن صلة العبد بربنا مهمة جدا، وأنا شخص ديموقراطي في كل حاجة في حياتي وحتى مع بناتي الإقناع مهم ليهم وتوضيح كل شيء في حياتهم.

علاقة تامر هجرس وزوجته

وفي الحلقة نفسها، كشف تامر هجرس عن علاقته بزوجته، فقال: مهم تكون العلاقة بين الرجل والست قايمة على الصداقة، ويكون فيه صراحة بينهم، الرجل الشرقي لازم يحب زوجته ويفتخر بها ويعليها دايما، ولكن الغيرة هي عدم ثقة في النفس أو الغير.

وتابع: فعمري ما أحطها في موقف هي تغير لأني واثق من نفسي والعلاقة بيننا، وزوجتي متفهمة طبيعة شغلي وتواجدي في أي مكان والناس بتيجي تتصور معايا.

أما عن الشائعات التي يتعرض لها من وقت لآخر قال تامر هجرس: أنا بحب الإشاعات اللي بتطلع عليا، بتبقى لذيذة ومسلية وهي ضريبة الشهرة.

تامر هجرس: كل حاجة نفسي فيها عندي

وفي الحلقة ذاتها، قال تامر هجرس: رمضان بالنسبة ليا عبادة ورياضة ومقابلة أصدقائي، وبالنسبة ليا القرآن والصلاة نوع من التأمل، بحيث تاخذ وقت لنفسك بعيدا عن أي زحام في المخ وعقلك مركز بس في الصلاة والعبادة وكأنك بتغسل نفسك، وتخرج بني آدم تاني.

وتابع: ومهم الإنسان يكون له وقت لنفسه وينضف روحه عشان يدي طاقة حلوة للي حواليه، والحمد لله كل حاجة أنا نفسي فيها عندي، وأنا مكتفي بكل الحاجات اللي في حياتي وعايز يكون عندي قناع ورضا ودايما مكتفي وقريب من ربنا وبس، وأي حاجة تيجي إضافة فهي خير وبركة من عند ربنا.

تامر هجرس في برنامج الستات

وفي وقت سابق، تحدث الفنان تامر هجرس عن دور المرأة ومدى تأثيرها في العلاقات أكثر من الرجل، وذلك خلال لقائه ببرنامج الستات ميعرفوش يكدبوا.

وقال تامر هجرس: الراجل بيكمل بوجود الست في حياته، اكتر من العكس.. بحس الراجل بجد راحة باله التامة برضا المرأة اللي في حياته، بعد رضا ربنا اولًا.