منظمة الحفل تطاولت عليا واتفاجئت براقصات على المسرح.. كواليس أزمة أحمد سعد في تونس

كشف الفنان أحمد سعد عن كواليس أزمة حفله في تونس، التي أصبحت حديث السوشيال ميديا خلال الأيام الماضية.

تحيا مصر يرصد كواليس أزمة حفل أحمد سعد في تونس.

أزمة حفل أحمد سعد في تونس

وقال أحمد سعد للإذاعة التونسية، إنه يقدر ويحترم السيدات التونسيات، ولكنه لا يعتبر منظمة الحفل تمس المرأة التونسية بسبب تطاولها عليه، معقبًا: أنا أعتذر للسيدات التونسيات ولا اعتذر لمنظمة الحفلة طول حياتي، والسيدة التونسية أكبر وأعلى وكثيرة الاحترام، ومقبلش أن المنظمة دي تكون بتمثل السيدة التونسية.

وأكد أحمد سعد على أنه لم يخطئ ولم يسيء للمرأة التونسية أو غيرها من شعب تونس الحبيب.

تصريحات أحمد سعد 

وتابع: احتراما لآداب الحديث لما يكون فيه حد بيتكلم مع حد مينفعش حد يجي يقطع الكلام، الفيديو موجود وأنا قولتلها لو سمحتي أسكتي أنتي، قولتلها 3 مرات.

وأضاف: المفروض تسكت، إنما هي قال أنت واخد فلوس وواخد 80 ألف دولار فقولتلها أخرسي لأنها لازم تسكت عن اللي هي بتقوله وأنا أثبت ده في المحضر، لأني قولتلها 3 مرات لو سمحت اسكتي، واسكتي دي مش عيب، لأن مينفعش أكون بتكلم مع 10 صحفيين وحد يقطع عليا الحديث لازم يسكت.

واستطرد: لا عاش ولا كان اللي يغلط فيها، وعندنا الفنانات التوانسة لما بيتكلموا في أي مهرجان إحنا بنقعد ونسمع ونستفاد من الأديبات والآنسات التونسيات، والسيدة التونسية متعملش الحاجات اللي حصلتلي، ومتشتمش واحد جاي ضيف وتقوله أنت فنان مش محترم.

سبب انفعال أحمد سعد في تونس

وعن تفاصيل الأزمة في تونس، قال: روحت الحفلة ملقتش العربية مستنياني وصديق ليا هو اللي جابلي العربية وداني المهرجان، ولما روحت المهرجان ومكتوب في العقد بتاعي أني معملش لقاءات صحفية، ومكتوب في العقد كدا لأن المؤتمر الصحفي لازم يكون له مكان آمن داخل المسرح ولازم يكون غرفة مخصصة، وأنا مكنش ليا غرفة أصلا داخل المسرح، أنا دخلت المسرح وعارف إني كدا كدا هكون موجود في قرطاج وفيه مؤتمر صحفي هناك منتظم، ومحصلش إني كنت متفق إني هعمل لقاءات.

وأردف: أنا هعمل فيديو هظهر فيه بنود العقد والمنظمة بتقول فيه إني هعمل مؤتمر صحفي وأنا قولتلها مش هينفع للسبب اللي ذكرته لأني كدا كدا هكون موجود قريب وهعمل مؤتمر صحفي تاني منظم فأنا رفضت، وهي برضو دعت الصحفيين ولما خرجت لاقيت الصحفيين عارف أنهم متبلغوش بحاجة اسمها عقد وقولتلهم كل الحب والتقدير للإعلام التونسي وأتشرف أني أطلع معاكم، وده قبل ما أخش أغني ومعايا فيديو لما شوفتهم.

واستكمل: قولتلهم أنا طول عمري أغني قدام الجمهور التونسي الذواق، ولما طلعت على المسرح، في تاني أغنية ليا لقيت راقصات وأنا معرفش إنهم داخلين عليا وأنا بغني، وأنا معملتش معاهم بروفة ولا أعرف هما مين ولا لابسين أيه ومعرفش الموضوع ده، واتضايقت جدا وأنا بغني لأن لازم يكون فيه تنسيق على الموضوع ده، ودا شيء مهين لكل الأطراف، وقولتلهم ده مينفش فطلعوا وأنا مبحبش أكسر نفس حد بس ده سوء تنظيم ليا وليهم.