مروة عبد المنعم: رهبة الطلاق زي الموت.. ونفسي أبقى شريرة

أكدت الفنانة مروة عبد المنعم على أنها ليست شريرة بطبعها، وذلك خلال لقائها اليوم ببرنامج miniz المذاع عبر فيسبوك.

تحيا مصر يرصد تفاصيل تصريحات مروة عبد المنعم

تصريحات مروة عبد المنعم

وقالت مروة عبد المنعم: أنا مش شريرة خالص، وبتضايق من طيبتي، نفسي أبقى شريرة، وحويطة، أنا أطيب حد ممكن تشوفيه في حياتك، وعلى طول بندم على طيبتي لأنها على طول بتوقعني في مشاكل كتير جدا.

وتابعت: مثلا تلاقي حد كلمني في مشروع، وأنا معرفوش أصلا، وحسيت أنه طيب، وقالي هنعمل كذا وكذا، اديتله كل فلوسي ونصب عليا، أنا ممكن أدي عفشي لحد.

مروة عبد المنعم: رهبة الطلاق زي الموت

وعن الطلاق قالت: دايما أقول أن الطلاق له رهبة زي رهبة الموت، مهما كنت مؤهلة نفسك للطلاق دا، لكن فيه حياة جديدة بتتبني، حياة لوحدك مفيش بابا أو زوج، أنتي مطلقة مع الحياة، شيء مرعب ومسئولية، تحدي قوي جدا وصعب.

مروة عبد المنعم: معنديش رفاهية الانهيار

وسبق وأن تحدثت الفنانة مروة عبد المنعم عن تفاصيل حياتها الشخصية في الفترة الأخيرة، وتأثير تجربة الطلاق عليها، وذلك خلال لقائها ببرنامج الستات المذاع على شاشة تلفزيون النهار.

وقالت مروة عبد المنعم: أنا معنديش رفاهية الانهيار، ودا لوحده بيتعب أوي، أنا لما بحب أعيط مش بعيط في بيتي لأن فيه مراقية من عيالي، فبقولهم أنا نازلة أجيب حاجة وأركب عربيتي وأمشي في الشارع وأقعد اصرخ وأعيط، وأرجع.

وتابعت: أنا مشكلتي بدأت من بعد الثورة، مبقاش فيه إقبال على الشغل، ومعرفش ايه السبب، وطلاقي كان أصعب من قضية البنت اللي كانت شغالة عندي وماتت، في القضية حسيت بظلم واتهام الناس ليا من غير ما يفهموا الموضوع، ولما حصل دا سيبت فيلتي وروحت شقة إيجار، وبعدها حصل الانفصال.

حريق غرفة ابنة مروة عبد المنعم 

وفي وقت سابق، كشفت الفنانة مروة عبد المنعم عن تعرض غرفة ابنتها حور للحريق، وذلك من خلال حسابها الرسمي على موقع التواصل الاجتماعى فيس بوك.

وكتبت مروة عبدالمنعم: «فى لحظة أوضة بنتي بتتحرق دلوقتي، حاجه مرعبة أوى، قدر الله وما شاء فعل».

ونشرت مروة عبد المنعم صور من الحريق، عبر حسابها الرسمي بموقع التواصل الاجتماعي فيس بوك، وعلقت عليها قائلة: شكرًا جدًا لكل الناس اللي أتصلت بيا عشان تطمن.. الحمد لله والشكر ليك يا رب.