مراد مكرم: المسرح مسئولية كبيرة والعائد المادي بتاعه قليل وتقديم البرامج جه معايا بالصدفة

تحدث الفنان مراد مكرم عن بدايته الفنية ودخوله عالم التمثيل، كما تحدث عن علاقته بزوجته، وكشف عن بعض الأسرار عن حياته الشخصية.

تحيا مصر يرصد لكم تصريحات مراد مكرم

وقال مراد مكرم خلال استضافته في برنامج مساء دي أم سي الذي يقدمه الإعلامي رامي رضوان ويعرض عبر قناة دي أم سي: بدايتي كانت في المسرح وأول مرة أمثل كان مسرحيتين فرنساوي والمسرح مسولية كبيرة جدًا وأقل صدى وعائد مادي وهو اكتر حاجة بتاخد وقت وأنا بحب المسرح، ولسه مجاليش مسرحية تخليني اتفرغلها.

وكشف: وأنا صغير كنت عايز أبقى ممثل ومغني وتقديم البرامج جه بالصدفة وصديقة ليا كلمتني وروحنا قدمنا وعمري ما كنت عايز ابقى مذيع.

مراد مكرم: التمثيل كان حلمي

وتابع: بس المذيع أنت بتدخل بيوت الناس بشخصيتك وفي التمثيل بشخصية اللي بتقدمه والمغني بالكلمات الي بتأديها، ومش بتعرف الممثل ولا المغني شخصيته الحقيقية إيه، والمذيع أقرب للناس شوية وحبيتها ، لكن لو هختار حاجة واحدة هختار أكمل ممثل لأنه كان حلمي.

وأوضح مراد مكرم: كان بيحصلي مشاكل في القلب وبصحى من النوم بضربات قلب غير منتظمة وجيراني اللي وقفوا جنبي وكانوا بيروحوا معايا المستشفى وشايلهم الجميل فوق راسي لأنهم اتمرمطوا معايا.

مراد مكرم: بعرف أكل لكن مش بعرف أطبخ

كما تحدث عن حبه الشديد للطعام والأكلة المفضلة له وقال: مراد مكرم: الأكلة الأهم في حياتي هو طبق الفول بالزيت الحار والطعمية ودي أكلة بالدنيا كلها بالنسبالي، وأنا بعرف اكل بس مش بعرف اطبخ.

كما تطرق بالحديث  عن زوجته وقال: هي عشرة السنين والتعب وهي الأسرة والاصدقاء وهي ست جدعة، وهي كزوجة استحملت حاجات كتير لغاية ما وصلنا للي أنا فيه.

تصريحات مراد مكرم

 وفي اللقاء ذاته، تحدث مراد مكرم عن أعماله مسلسل علاقة مشروعة وغرفة 207 وقال: بخاف من الكتابة الوحشه في الأعمال وطالما عجتني القصة والكتابة بعمل أحسن حاجة عندي ومش بخاف من أي دور بعمله، ولكن كنت خايف من مسلسل غرفة 207 لإني كنت بتكلم بالإيطالي وخوفت يبان عدم إتقاني للغة.

وكشف: مش بعمل دور الخيانة بس، ومسلسل فوق مستوى الشبهات كان خيانة لكن علاقة مشروعة كانت خدعة مش خيانة لكن كان أول مرة أعمل أن صديقي الصدوق يخوني، والممثل الجيد هو يمثل أي عمل وأي دور، وأنا عملت شخص يهودي وعادي مقولتش لا.