لقاء الخميسي تثير الجدل: أي دين فيه محبة أنا مؤمنه بيه ومسلمة بالوراثة

فجرت الفنانة المصرية لقاء الخميسي عدة تصريحات حول ديانتها، وذلك في تصريحات تلفزيونية لها.

تحيا مصر يرصد تصريحات لقاء الخميسي.

ديانة لقاء الخميسي

قالت لقاء الخميسي: أنا ديانتي المحبة، وأي دين فيه محبة أنا مؤمنة بيه، بالوراثة أنا مسملة.. والمسلم هو من أسلم قلبه للإله، أنا أسلمت قلبي للإله بكل الأديان، وأنا بحترم كل الناس.

تصريحات لقاء الخميسي

وتابعت : البلد اللي كنت عايش فيها كان فيها حضارات مختلفة هندوس ومسلم ومسيحي كل حاجة، كل زمايلي من كل الأطياف، كنا أطفال مفيش فرق بينا، في الاخر كله مؤمن بوجود الإله.

وأضافت: أنا مسملة في الباسبور، وأهلي وأبويا وأولادي وجوزي مسلمين، وأمي مسيحية وأهلها أنا اتربيت مسيحيين، فأنا أتربيت في عائلة فيها الاتنين، فلازم أحب الاتنين مش معقول هعدم الست يعني.

تعرض لقاء الخميسي للتنمر

هذا وكانت كشفت لقاء عن تعرضها للتنمر في المدرسة بسبب وزنها الزائد، وقالت: “أنا كنت في الإعدادية بنوتة مقلبظة جدًا في مرحلة المراهقة، بالرغم من أني كنت بلعب رياضة، وكنت بلعب باتيناج واسكواش وتنس، والتخن اللي كنت فيه كان بسبب الهرمونات والتحول من طفلة الى مراهقة”.

وتابعت قائلة: “وساعات كتير أوي مكنتش مبسوطة بنفسي وبحس أني مهزوزة ومش واثقة في نفسي وخصوصًا أن فيه ناس كتير من صحابي في المدرسة كانوا بيهزروا معايا بطريقة مش ألطف حاجة، زي ايه دا دا انتي تخنتي كدا ليه، وأكيد هما مكنش قصدهم”.

وأوضحت لقاء أن والدتها هي من كانت السبب وراء تغلبها على التنمر، حيث قالت: “وأنا كنت متصالحة مع نفسي جدًا علشان أمي كل يوم الصبح وأنا لابسة لبس المدرسة وتخينة كانت بتقولي أنتي قمر في سماه أنتي أميرة جميلة، وكل البنات اللي ربنا خلقهم أميرات جميلات، كل واحدة على حسب شكلها وجمالها وسحرها، ربنا خلقنا مختلفين ومن الاختلاف بيظهر الجمال”.

وحرصت لقاء الخميسي على توجيه نصائح للمتنمر به، حيث قالت: “أي حد بيتريق أو بيقول كلام مش كويس بيصعب عليا، علشان أنا ببقى متأكدة أنه جواه وجع ما بيحاول يخرجه نتيجة كلمة اتقالت له وهو صغير من أهله أو صحابه وجعته أوي أوي مش عارف يتخلص منها فبيطلعها على الاخر”.

وأضافت قائلة: “وعشان الكلام ميأثرش فينا لازم يكون عندنا ثقة في النفس، وهتيجي من حبك لنفسك، ربنا خلقنا عشان بيحبنا عشان أنت رسول ربنا على الارض، ربنا بيحبك جدًا زي ما أنت، قصير طويل تخين رفيع، وعشان أنت ترد الحب لربنا لازم تحب نفسك”.