بسمة وهبة: الناس اللي متعودة تدبح هتستنى لحمة من أهل الخير.. متتكسفش تشتري ربع كيلو

علقت الإعلامية المصرية بسمة وهبة على ارتفاع أسعار اللحوم، والتي ستجعل المعظم غير قادر على الأضحية، مستنكرة جشع التجار.

تحيا مصر يرصد تصريحات بسمة وهبة. 

تصريحات بسمة وهبة

وقالت بسمة وهبة في برنامجها 90 دقيقة: عيد الأضحى بعد أيام وربنا يعيده علينا بالخير والبركة، وبثقافتنا كمصريين هو عيد اللحمة وكل الناس فيه بتتسابق عشان تضحي، ومش بس عشان السبب الديني بس عشان تدبح وتهادي بعض وتتصدق، وفيه ناس حرفيًا ومش ببالغ مبتعرفش طعم للحمة غير من العيد للعيد والكل بيتسابق في الخير، وخير عيد الأضحى هو خير الأضاحي.

بسمة وهبة تعلق على زيادة أسعار اللحمة

وتابعت: بس للأسف السنة دي الوضع غير وبقى واضح كده ارتفاع أسعار اللحمة وفيه ناس مش هتقدر تضحي، مش هنقدر ننكر إن إحساس صعب على الناس اللي متعودة تدبح في العيد واللي في القرى والشوارع المحتاجة أنها تستنى عشان يدخل بيته 2 أو 3 كيلو لحمة من أهل الخير.

وأضافت: أوعى تتكسف أنك تشتري ربع كيلو لحمة خليك على قدك وواثق من نفسك ووفقًا للأرقام والاحصائيات مفيش إقبال على شراء الأضاحي السنة دي.

بسمة وهبة تستنكر جشع التجار

واستطردت: عايزة أقول منهم لله.. اللي هما كل تاجر جشع كل صاحب مزرعة مش بيراعي ضميره، كل تجار أزمات الأعلاف وكل اللي لعبوا في سوق اللحمة وتسببوا في ارتفاع أسعار الأضاحي 3 أضعاف السنة اللي فاتت.. سرقوا فرحة الناس الغلابة بعيد اللحمة لأن المضاربات اللي عملوها وجشعهم اتسبب في رفع أسعار اللحمة بالشكل ده عارفة أن الأسعار غالية.

واختتمت بسمة وهبة حديثها قائلة: متقولوش العلف والدولار أنتم بتقعدوا تسمنوا في الخروف بتاعك وتحط له ملح في العلف ويوزن وتضحك على الزبون يا غشاشين يا كدابين.