خاص| عايدة غنيم بطلة الحاج متولي: أنا معتزلتش ونفسي أرجع للتليفزيون المصري تاني

كشفت الفنانة عايدة غنيم عن حقيقة اختفاءها عن الساحة الفنية واعتزالها التمثيل، وذلك خلال لقاءها بموقع تحيا مصر، معربة عن أمنيتها الشديدة في العودة للتليفزيون المصري من جديد.

تحيا مصر يرصد في ذلك التقرير تصريحات عايدة غنيم عن غيابها عن الساحة

عايدة غنيم: أنا لسة موجودة معتزلتش ونفسي اشتغل في تليفيزون بلدي

وقالت عايدة غنيم عبر موقع تحيا مصر: فيه ناس كتير فكراني اعتزلت وأنا معتزلتش انا لسة موجودة والمخرجين الجداد ميعرفوش غير النجوم الموجودين دلوقتي.

وتابعت حديثها، قائلة: أنا أمنية حياتي أشتغل في تليفزيون بلدي بس حاجة تكون كويسة ترجعني برجوع حلو وقوي عشان اتشاف زي ما كنت متشافة الأول، وأنور زي ما كنت منورة مع الحاجة متولي.

عايدة غنيم: كنت محظوظة إن أول دور ليا يكون في الحاج متولي

وتحدثت عايدة غنيم عن مشاركتها في مسلسل الحاج متولي، فقالت: كان ليا الشرف وكنت محظوظة إن أول دور أعمال يبقى في مسلسل كبير زي الحاج متولي، وإن أقف جنب النجم نور الشريف دي كانت حاجة بالنسبالي في قمة السعادة، والحاجة متولي وفر عليا 5 أو 6 أعمال كنت هعملهم عشان الناس تعرف وشي بس.

وتابعت حديثها عن نور الشريف، فقالت: نور الشريف كان محتوينا جدا، وكنا بنفطر وبنتسحر مع بعض كان بيحس بالممثل اللي قدامه ولو هو متوتر ممكن يوقف التصوير عشانه، وعنده استعداد يعيد مرة واتنين وتلاتة عشان يطلع الممثل بشكل حلو وهو عمره ما اتعصب وكان من أول الناس اللي بيتجي اللوكيشن وكنا بنتكسف أما نيجي في معادنا نلاقيه موجود.

وعن نجاح العمل قالت عايدة غنيم: الناس كانت بتقولي من أول حلقة انتي اللي في الحاج متولي ولا حد شبهك، يعني اتعرفت من عرض اول حلقة في العمل.

عايدة غنيم في الحاج متولي

ويذكر، أن عايدة غنيم تألقت في الحاج متولي والذي دارت أحداثه حول متولي رجل يبدأ حياته من الصفر، حيث يعمل لدى تاجر أقمشة يثق به كثيرًا، وبعد وفاة التاجر يتزوج متولي من أرملته وينجب منها، لتتوفى هي، ويدير هو الثروة كلها، حتى يصبح من أكبر التجار في المنطقة، لتتوالى بعدها زيجاته الواحدة تلو الأخرى.