أحمد العوضي: أنا كتاب مفتوح لياسمين عبد العزيز والزواج الناجح بيعتمد على السرية بين الطرفين

كشف الفنان أحمد العوضي كواليس العمل مع ياسمين عبد العزيز في مسلسل ضرب نار، كما تحدث عن علاقتهما، وتطرق بالحديث عن بدايته الفنية وعلاقته بالفنان الراحل نور الشريف.

تحيا مصر يرصد لكم تصريحات أحمد العوضي 

وقال أحمد العوضي خلال استضافته في برنامج صاحبة السعادة والتي تقدمه الإعلامية إسعاد يونس ويعرض عبر قناة دي إم سي: اتبسطت جدًا لما الجمهور شبهني بأحمد زكي، وشرف لأي فنان أن اسمه يرتبط باسم الفنان أحمد زكي.

وأوضح: أنا وياسمين بنفضل نضحك في الكواليس وهي بترميلي السلسلة في مسلسل ضرب نار ضحكت، وبحب مسلسل ضرب نار لأنه شخصية جديدة عليا وكان تحدي ليا أنا وياسمين لانها كانت شخصية جديدة عليها برضو.

أما عن أزمة ياسمين عبد العزيز ومرضها قال العوضي: أزمة ياسمين كانت صعبة عليا ولما بنفتكر الأيام دي بنشوف الحلو ونحمد ربنا وبتقعد تضحك على قد ما الموضوع كان موجع جدا بس نحمد ربنا أن الموضوع عدى.

أحمد العوضي: الزواج الناجح بيعتمد على السرية بين الطرفين

وتحدث العوضي عن علاقته بزوجته الفنانة ياسمين عبد العزيز وقال: في بداية زواجي من ياسمين كنت عصبي واللي أقوله يمشي وفهمت أن الموضوع مش فرض سيطرة، وأي زواج ناجح بيعتمد على السرية بين الطرفين، وأنا كتاب مفتوح لياسمين عبد العزيز ومش بخبي أي حاجة عليها .

أما عن شائعة إنجاب ياسمين عبد العزيز قال أحمد العوضي: لقيت الناس في الشارع بتقولي أحلى على الأحلى يا أبو أدم.

وتحدث العوضي عن السوشيال ميديا وقال: السوشيال ميديا مكان الناس بتتعرف على ثقافات بعض وهي شبه جورنال زمان وليها سلبيات أن أنت بقيت تكسل تروح لصاحبك أو أهلك وهي لغت الإنسانيات بين الناس.

وأستكمل: الناس بتاخد دايما بالظاهر على السوشيال ميديا وبنعمل أحكام بناءً على صورة والناس بتبني انطباعات وافكار على وهم وهو مجتمع كتير الإشاعات والناس بتكسل تعرف الصح منين.

أحمد العوضي: مش بضايق من التعليقات السلبية وبحترم رأي الجميع

وأضاف: مش بضايق من التعليقات السبية لأن ده رأي وأما بحترم أي رأي ومفيش حد بيتفق عليه كل الناس ومش بكره اللي مش بيحبني ولا احجر على رأيه ومش برمي كل حاجة على الأخرين ولا أشوف مين هاجمني وأنا بشتغل للناس اللي بيحبوني.

أحمد العوضي: نور الشريف أب روحي ليا

وكشف أحمد العوضي عن علاقته بالفنان الراحل نور الشريف وقال: طورت نفسي بعد نصيحة نور الشريف وهو اكتشفني وهو الأب الروحي ليا واداني الثقة إني هبقى حاجة كويسة وكان بيتعامل معايا على إن أب وابنه وكان بيقولي وسع مدركك ويبقى عندك ثقافة في كل شئ.

وكشف: كنت برفض أعمال كتير عشان مكنتش لاقي حاجة زي الدالي، وقولت لنور الشريف أنت قولتي أنت هتبقى نجم ومحصلش كده وكنت بلومه وبعاتبه وقالي أكيد انت في حاجة ناقصة ولازم تشتغل وتبقى جاهز عشان تبقى ناجح والنجومية هتيجي مرة واحدة .