أحمد العوضي: حاسس إني سفير للطبقة الشعبية ومش بستخدم دوبلير في مشاهد الأكشن

تحدث الفنان أحمد العوضي عن نشأته في عين شمس، كما تحدث عن كواليس مسلسل ضرب نار، والذي عرض في السباق الرمضاني المنقضي وحقق نجاحًا كبيرًا.

تحيا مصر يرصد لكم تصريحات أحمد العوضي

وقال أحمد العوضي خلال استضافته في برنامج إسعاد يونس الذي يعرض عبر قناة دي إم سي: كان لينا هدف أنا وياسمين نعمل مسلسل يتساهل الناس تتفرج عليه ويحترم عقولهم.

وتابع:  مدرب اللهجة خاص بالكلام لكن الطريقة بتاعت اللكنة تعايشت مع واحد من سوهاج والراجل اللي تعايشت معاه لما بيتعصب بيتكلم بسرعة وأنا بقيت أفهم الكلام منه وقعدت طول الوقت بتكلم صعيدي والبيت بتكلم صعيدي وفي كل حتة .

أحمد العوضي: بعتز بطفولتي في عين شمس وحاسس إني سفير للطبقة الشعبية

كما تحدث عن نشأته وقال: أنا معتز بنشأتي وبحب طفولتي في عين شمس وأنا سيبتها من قريب وطالع بأخلاق وأصول أهل عين شمس وحاسس إني سفير للطبقة الشعبية وده خلاني محتفظ بأصورلهم وعادتهم.

وكشف العوضي: والدتي توفت وأنا عندي 9 سنين، ووالدي اللي رباني أنا وأخويا عشان كده شخصيتي ناشفة والبيت كان بسيط كان 60 متر.

واستكمل: والدي محرمنيش من حاجة بس على قده ووالدي اداني الحرية إني اشتغل ممثل، وكنت مُحمل بتجارب عين شمس وخبراتها كنت عايز أعمل نفسي وكنت عايز إي حاجة حاجة انجح بيها انزل اشوف صدى الناس.

وتابع: بروح عين شمس كل أسبوع بس انزل بليل وبنتمى ليهم جدًا، وأنا دايمًا بقول أخواتي ومش بقول كلمة جمهوري وأنا محمل بلغة أهل منطقتي عين شمس

أحمد العوضي: أنا وياسمين عبد العزيز بنكمل بعض

كما تحدث العوضي عن العمل مع ياسمين عبد العزيز وقال: أنا وياسمين مش واخدين قرار معين أننا نكمل كل الشغل مع بعض، بس بيتوقف على المواضيع وتكملة للنجاح مش أكتر وممكن السنة الجاية كل واحد يشتغل لوحده وده مش قرار .
وتابع: الشغل مع ياسمين عبد العزيز سهل وصعب بس سهولته أحلى لأننا بنكمل بعض وساعات مش بعرف أفصل بين الشغل وإنها مراتي.

أحمد العوضي: مش بستخدم دوبلير في مشاهد الأكشن

كما تحدث عن مشاهد الأكشن في المسلسل، ومشاهد الصقر وقال: مشاهد الأكشن بتتكتب ليا والمشاهد بتختلف من شخصية لشخصية وساعات بيبقى عندي قدرات مش بعرف أطلعها في كل الشخصيات لكن الأكشن بيبقى معمول ليا .
وكشف أحمد العوضي: مش بستخدم دوبلير في مشاهد الاكشن، ولو استخدمت بدوبلير بحس اني بضحك على المشاهد وبحس إني ناقصني حاجة.

وعن مشاهد الصقر في مسلسل ضرب نار قال:  الصقر اتمرنت عليه وهو ضخم واخترت إني أوقفه على دراعي واتمرنت معاه وهو خد عليا، والصقر عورني في ضهري وإيدي بس كله يهون عشان المشاهد.