مي عمر: بنتي الكبيرة نسخة من باباها ومسلسل علاقة مشروعة كان شخصيته جديدة عليا

تحدثت الفنانة مي عمر عن علاقتها مع المخرج محمد سامي، كما كشفت عن كواليس مسلسل علاقة مشروعة، وتحدث محمد سامي عن أعماله الفنية.

تحيا مصر يرصد لكم تصريحات محمد سامي ومي عمر

وقالت مي عمر خلال لقائها في برنامج صاحبة السعادة: بنتي طالعة شقية جدًا زي باباها والصغيرة طالعة هدية شبهي، والكبيرة شبهوا في كل حاجة وبتحب تلعب وعندها حس فني.

كما كشف محمد سامي عن شخصية زوجته مي وقال: مي هادية بس زيادة عن اللزوم ولو دخلنا قعدنا في مكان تقعد 4 ساعات تسمعنا ومتشاركش في الحوار.

وتابع: أنا لو مش عندي شغل بفضل معاهم في البيت أو مع أهلي أو في المزرعة، وبقعد في الإجازة بلعب مع مي والبنات، وبطبخ.

مي عمر: محمد سامي مقتنع أنه بيطبخ كويس

وكشفت مي عن موقف طريف لـ محمد سامي في الطبخ وقالت: محمد سامي مقتنع أنه بيطبخ كويس جدًا، وقبل ما نتجوز كان عايش لوحده وكان بيطبخ وواضح أنه كان زمان بس بيطبخ كويس، ودخل في مرة قال أنا هعمل ملوخية وأنا كنت مساعدة جمبه وعمل شوربة فيها بواقي ملوخية وطلعت وحشة.

وكشفت مي عمر: محمد سامي لما قال في تصريحات سابقة ليه  إني طبخت 6 مرات بس كان عايز يضحك الناس وده ظلم وافترى.

مي عمر تكشف كواليس مسلسل علاقة مشروعة

وتحدثت مي عمر عن كواليس مسلسل علاقة مشروعة وقالت: مينفعش الممثل يفضل يعمل نفس الحاجة طول الوقت وبحس أن الجمهور اتغير وبقى عنده وعي اكتر ويقدر يفرق أن دي تمثيل مش حقيقي وحسيت الشخصية مختلفة ومعملتهاش قبل كده.

وتابعت: كان في مشاهد كتير رخمة، ومشهد الوقعة بيني وبين ياسر جلال وقعت بجد، و الكيميا بيني وبين ياسر كبيرة، وهو شخص مريح جدا ومحترم وانا بحبه جدا وهو نسمة في اللوكيشن وأي حد عنده مشكلة بيحب يحلهاله.

مسلسل علاقة مشروعة

مسلسل علاقة مشروعة عرض في السباق الرمضاني المنقضي وحقق نجاحًا كبيرًا، وكان يضم عدد كبير من نجوم الفن ومنهم مي عمر، ومراد مكرم، وياسر جلال، وداليا مصطفى.