محمد عبد العظيم: خوفت من شخصيتي في مسلسل تحت الوصاية والدور قلقني

كشف الفنان محمد عبد العظيم عن كواليس مسلسل تحت الوصاية، والذي عرض في السباق الرمضاني المنقضي 2023 وحقق نجاحًا كبيرًا.

تحيا مصر يرصد لكم كواليس مسلسل تحت الوصاية

وقال محمد عبدالعظيم في لقائه مع برنامج its showtime على قناة cbc :الدور كان بالاتفاق مع المخرج محمد شاكر خضير، واستقرينا على الشخصية وأبعادها ولكنتها الدمياطي، وبدأت أشوف تفاصيل الشخصية من خلال الورق اللي مكتوب كويس جدًا.

محمد عبد العظيم: أول ما قريت شخصيتي في مسلسل تحت الوصاية خوفت

وتابع: الشغل مع محمد شاكر خضير رائع، فهو قادر على توجيه الممثل واستخراج أفضل ما فيه، فهو مخرج متميز جدًا.

واستكمل:الشخصية تخوف، وأول ما قريت الشخصية خوفت، وسألت نفسي: هل شره مبرر أم لا؟ فهو عنده وجهة نظر لأن حنان بالنسبة له جاية تبوظ له قوانين السوق، فبالتأكيد هيهرسها لأنها سمكة صغيرة بالنسبة له وهو حوت.

محمد عبد العظيم عن مسلسل تحت الوصاية: الدور كان مخوفني

واستطرد: والدور كان مخوفني، بس النتيجة كانت مرضية جدًا، وجيلي متعلم كويس جدًا فكرة الذاكرة الانفعالية، فأنا قابلت ناس شبهه مش بالضرورة يكونوا شغالين في السمك، ففكرة إنه جشع ومعندوش رحمة، ويدوس على أي حد مقابل المادة، هذا موجود وشفته، واستعنت به وبحركته وهو ماسك الفلوس، وحركاته، وبقيت مستعين بهذا الشخص.

تصريحات منى زكي عن مسلسل تحت الوصاية

وسبق وعلقت الفنانة منى زكي، على مسلسل تحت الوصاية الذي أدت بطولته، وقالت خلال مداخلة هاتفية لبرنامج "كلمة أخيرة"، على قناة أون، تقديم لميس الحديدي: اللي اختار الموضوع وفكر فيه هما شيرين وخالد، وأنا تحمست لحاجة إنسانية تمس السيدات وسمعت لمثل تلك المواقف وأصعب منها.

وتابعت: "الستات عايزين يكونوا أقوياء، وصعب تقلل من قدراتهم ومخهم مهما كانت بساطتهم، موضحة أن أكثر شيء أثر فيا هو ولادي، واللي جذبني لحنان إني هشتغل مع مخرج كبير وحساس ومهم وفاهم تفاصيل، وطاقم عمل كلهم ناس محترفة بيهتموا بالتفاصيل، ولما بنتكلم عن قضية بنتكلم عن الحياة والتفاصيل اللي بنمر بيها، والستات في مصر والوطن العربي بتعافر مع نفسها ومع معلوماتها وقدراتها وبتكتشف القدرات اللي كانت مهملة في نفسها.

وتابعت: أدين بكل الفضل للمخرج اللي حاول يقربني للشخصية، وأنا كنت جاية من شغل تاني ومحملة بحاجات تانية والوقت قصير جدا.

وعن أصعب موقف في المسلسل، قالت: أصعب مشهد لما ابني ضاع مني، وبعد ما كل المعافرة والمحاولات دي لو ده راح.. فمفيش حاجه تسوى.