أدمن في جروبات الستات الخاصة.. حنان تطلب الخلع: عامل حنين وبيحل مشاكلهم

حنان زوجة في نهاية الثلاثينات من عمرها، وزوجها رامي لا يكبرها بكثير فالفارق بينهما بالكاد يكمل العام الواحد، حضرت إلى محكمة الأسرة في حلوان، لرفع دعوى خلع على زوجها وذلك بسبب إكتشافها محادثات له مع السيدات عبر منصات التواصل الإجتماعي.

مطلقة ومسجلة.. كهربائي يمزق جسد والدته في الهانوفيل: سيرتها على كل لسان

جاميكا اللي سرب الشات.. نهى الجندي عن أزمة حسن شاكوش: أنفصلوا من سكات|فيديو

حنان ترفع دعوى خلع على زوجها

تسرد حنان مأساتها مع زوجها، بأنها كانت تعيش حياة بسيطة طوال 7 سنوات، لا توجد مشاكل سوى المشكلات والمشادات الزوجية الإعتيادية التي تنتهي بنهاية اليوم، وأنجبت طفلين من زوجها، إلا أن الحال قد تبدل فقد بات زوجها لا يفارق المنزل كثيرا ولا يهتم بعمله والهاتف في يده طوال الوقت.

وقالت حنان، من 9 سنين فاتوا رامي أتقدم ليا وكلم عمي عشان والدي متوفي وأنا معنديش غير أخت بنت بس ومسافرة برا، وجه البيت بعد ما قعد مع عمي برا وقعدنا وأتكلمنا وعرفت أنه عنده شركة صغيرة بتاعته، وبعدين وافقت وأتخطبت له وأنا عندي 30 سنة، وفضلنا سنة وشهر مخطوبين وبعدين أتجوزنا في شقة في منطقة المقطم.

حنان: المشاكل كانت الطبيعية لمدة 8 سنين

وأضافت حنان في شكواها ضد زوجها، بعد شهور ربنا كرمنا بطفلي الأول وبعدين لقيت رامي أشترى شقة في حلوان قريبة من المرصد وقالي دي أوسع وأكبر وعشان أكون قريب من الشركة في مايو، وفعلا نقلنا وعشت أنا وهي سوا كانت المشاكل قليلة وزي أي إتنين، وبعد 4 سنين ربنا رزقنا بالطفل الثاني.

وتابعت الزوجة الثلاثينية في حديثها، مكنش في حاجة غريبة باينة على رامي لكن من حوالي 6 شهور أنا كنت قاعدة وأخدت اللاب بتاعه أنزل منه مسلسلات وأفلام، ولقيت الفيسبوك مفتوح، وبفتح الأكونت لقيته أدمن في جروبات ستات كتير جدا، ولقيته مكلم ناس كتير.

زوجة: لقيت جوزي أدمن على جروبات الستات

قفلت اللاب وسيبته زي ما هو عشان ما يخدش باله.. تقول حنان في مشكلتها مع زوجها: بالليل رامي نزل ورجعت جبت اللاب بتاعه وفتحته ولقيته قفل الفيسبوك، وفضلت أفكر إيه اللي أنا شوفته ده وإزاي كدة، وفضلت كل ما ينزل ويسيب اللاب أفتحه يمكن أشوف حاجة، لحد من 15 يوم فاتوا رامي نزل وساب اللاب وفتحت لقيت الفيسبوك مفتوح.

إستكملت حنان قائلة: فتحت المحادثات بتاعت جوزي ولقيت أنه حلال مشاكل وبيوصف وصفات بنات وبيتكلم في الطبيخ والأكل وكل حاجة تخص الستات بيتكلم فيها معاهم وبيشرحلهم العلاقات الزوجية، يعني بيطبطب عليهم، والمشكلة بقى أنه كان معايا يتنرفز لما أقوله ساعدني في البيت أو أعمل معايا أكل أو أي حاجة يقولي أنتوا دماغكم صغيرة وإهتمامتكم مش زي الرجالة.

وأختتمت حنان حديثها قائلة: قعدت يومين مش بتكلم وبعدها خليته قاعد بياكل بالليل وقولتله على إسم كام جروب من اللي هو أدمن فيهم، ورد قالي إنتي بتدخلي الجروبات التافهة دي ياستي فكك منها، قولتله الجروبات التافهة دي اللي أنت أدمن فيها، فضل يحلف أن الأكونت مش بتاعه وواحد صاحبه هو اللي بيفتح من اللاب، وزعق وخد بعضه ومشي، وبعدها رجع بالليل أتخانق معايا وقالي فين الدليل وأنتي بتقولي أي كلام، وبتخربي على نفسك وبعدها روحت لمحامية لأني ماليش حد عشان أرفع قضية خلع.