أحمد داود: أنا قلبي خفيف وبترعب من أي حاجة وفيلم يوم 13 يستاهل التعب عليه 4 سنين

تحدث الفنان أحمد داود عن كواليس فيلم يوم 13، وذلك بعد تحقيقه نجاحًا كبيرًا بعد عرضه ضمن موسم أفلام عيد الفطر، كما كشف عن بدايته الفنية.

تحيا مصر يرصد لكم تصريحات أحمد داود

وقال أحمد داود خلال استضافته في برنامج معكم التي تقدمه الإعلامية منى الشاذلي: أنا قلبي خفيف وبترعب من أي حاجة ومكنتش بدخل أفلام رعب وأنا صغير ومش بحبها.

وتابع: أنا زمان لما صحابي بيفتحوا سيرة حاجات الرعب والحكاوي دي كنت بمشي عشان بخاف، ولما بقيت أب مينفعش أبقى خايف مع العيال مين هياخد باله مننا.

أحمد داود: فيلم يوم 13 يستاهل التعب عليه 4 سنين

واستكمل أحمد داود: لما اترشحت للفيلم من شركة أوسكار قولت أنا هبقى كريم عبد العزيز الجديد، واحنا خلصنا الفيلم من 2020، والكورنا لما دخلت الكورونا المخرج مرضاش أنه ينزل الفيلم غير لما الدنيا تستقر، وهو يستاهل التعب عليه طول الـ 4 سنين اللي فاتوا.

وأوضح أحمد داود: كانوا عارفين إني بخاف وعملوا فيا مقلب ووقعت من طولي، وفي مشهد النجفة كنت خايف بجد مش تمثيل.

كما تحدث أحمد داود عن بدايته الفنية وكشف عن مجموعة في الثانوية العامة وقال: جبت 94 في ثانوية عامة وكنت بطل الجمهورية في الكونغ فو ودخلت هندسة حلوان.

ولفت أحمد داود: "وأنا في الثانوية العامة كان ابن خالي الله يرحمه هو توفى شغال في فرقة فنون جميلة اتيليه مسرح فكنت بروح اشوفهم وعجبني العروض اللى بيعملوها، وهما اللى خلوني أحب المسرح ومن وقتها انا عارف إني عايز ابقى ممثل وروحت لأبويا قلت له انا عايز يا بابا أسيب هندسة وأركز في التمثيل فكلمني علي ممثلين خريجين طب وهندسة وقال لي خلص هندسة وابقى ممثل وده اللى عملته وبقيت في فريق التمثيل بالجامعة.

أحمد داود: مسلسل سجن النسا نقطة فارقة في مشواري

وكشف: بدايتي الحقيقية كانت في ولد وبنت في 2010، وبعتبر دوري في مسلسل سجن النسا كان نقطة فارقة في حياتي وكنت عيل صغير وقتها وهو خلاني راجل كبير وغير حياتي.

كما تحدث عن مسلسل سوتس بالعربي وقال: بحب سوتس بالعربي وحبيت جدا الدور ومكنتش اتفرجت على المسلسل الأصلي وبعدها اتفرجت عليه وراهنت على الناس اللي مشافوش المسلسل الأصلي.

أحمد داود: هنعمل موسم تاني من برنامج الكونتينر

كما تحدث داود عن برنامج الكونتينر وقال: عملت برنامج الكونتينر من قلبي وهنعمل موسم تاني منه قريب

وأضاف: حبيت فكرة البرنامج جدًا ومكنتش مصدق أن دي حاجات موجوده في مصر وحسيت بفخر كبير لأن كل المصانع اللي روحتها بتصدر بره مصر.