حنان مطاوع عن سره الباتع: ترددت في المشاركة فيه.. وعيطت في مشاهد الخيل

تحدثت الفنانة حنان مطاوع عن تفاصيل مشاركتها في مسلسل سره الباتع، وذلك خلال لقائها اليوم ببرنامج مساء دي إم سي مع الإعلامي رامي رضوان.

تحيا مصر يرصد تفاصيل تصريحات حنان مطاوع في مساء دي إم سي

مشاركة حنان مطاوع في سره الباتع

فقالت حنان: الأستاذ خالد يوسف كلمني مشكورا، فطبعا انبسط جدا، فقالي مسلسل لرمضان، قولتله المكالمة دي على راسي من فوق بس أنا بحضر لمسلسل 30 حلقة اسمه كفر العميان، ومش هعرف أدخل في حاجتين مع بعض، وقولتله سامحني، فقالي أنتي بكرا فين، قولتله في البيت، راح قالي بكرا الصبح أنتي وجوزك تعزموني على حاجة، قولتله حضرتك تنور، اعزمك على ايه قالي فول وطعمية.

وتابعت: ونورني في البيت، وحكالي القصة وكانت رائعة، فقولتله هنعمل ايه في الوقت، قالي اعملي الاتنين وهيتم التنسيق، متقلقيش، فقولتله توكلنا على الله، والمسلسل التاني قعد يتأجل بتأجل لغاية ما متعملش خالص.

حنان مطاوع في سره الباتع

وفي الحلقة ذاتها كشفت حنان مطاوع عن الأمور التي حمستها للمشاركة في المسلسل، فقالت: أكتر حاجة شدتي لشخصية صفية أنها من جذورنا، وحسيت أنها رمز للأرض، وهي صفية فعلا، ومتفانية في حب الوطن والحبيب، وحسيت أني بعمل حاجة لبلدي، ومكنتش أعرف حجم الدور ايه، كان نفسي اعمل حاجة وطنية تؤرخ النضال والكفاح المصري ضد أي معتدي.

وتابعت: طلبت من خالد يوسف اضرب فرنساوي أو أجري بالخيل، وأنا عمري ما ركبت خيل، أنا أشوف الخيل أجري، فهو أخدته الحماسة وقعد يكتب، وبعد كدا قالولي عندك بروفة مع الخيل، قولتله أنا !.

واختتمت: واحنا بنمثل أنا ركبت على الخيل من هنا وعياط عياط عياط، يجي المشهد أمسح دموعي وأقول الجملتين، ويخلص المشهد واقعد أعيط.

أبطال مسلسل سره الباتع

ويشارك في بطولة مسلسل سره الباتع نخبة من النجوم وهم أحمد فهمي، ريم مصطفى، أحمد السعدني، حنان مطاوع، حسين فهمي، نجلاء بدر، عمرو عبد الجليل، صلاح عبد الله، هالة صدقى، أحمد عبد العزيز أحمد وفيق، منه فضالي، أحمد عبد العزيز، محمود قابيل، عايدة رياض، خالد سرحان، مصطفى درويش، علاء حسني، ناهد رشدي، أيمن عزب، أيمن الشيوي، مفيد عاشور، مجدي فكري، محمد الصاوي، ميسرة، صبري عبد المنعم.