زينة: الفن شغلانة كويسة ومش عيب كفاية أن الفنان الجمهور بيدعيله وممكن أعيش ببجامة عشان أوفى التزمات أولادي

كشفت الفنانة زينة عن سبب رفض والديها دخولها المجال  الفني، موضحة أنها بدأت عملها كمذيعة في بداية الأمر، بعد أن وافقت والدتها، ولكن لم تستمر.

تحيا مصر يرصد لكم تصريحات زينة 

وقالت زينة خلال استضتفتها في برنامج مساء دي أم سي والتي تقدمه الإعلامية إيمان الحصري: اشتغلت مذيعة شهرين أو تلاتة شهور بناء على رغبة والدتي، لأن فكرة المذيعة هلبس بدل حلوة وشيك ولذيذة.

وكشفت زينة أن والدتها كانت ترفض دخولها مجال التمثيل وأوضحت: مامتي كانت رافضة نهائي أني أشتغل ممثلة وضغطت عليا لحد ما شيلت جوايا وانفجرت.

وأضافت زينة: لما بلاقي حد من صحابي ولادهم عاوزين يمثلوا وهما مش عاوزين بقول لهم سيبوهم دلوقتي يعملوا التجربة بجد علشان ما تفضلش جواهم وعاوزين يحققوها لما يكبروا.

زينة: الفن شغلانة كويسة ومش عيب

وتابعت: سيبوهم هيزهقوا ويتعبوا ويطلعوا الطاقة اللي جواهم وممكن ينجحوا لأن الفن شغلانة كويسة جدا ومش عيب، واللي بيقولوا كده هما نفسهم بيتفرجوا علينا وبيجروا يتصوروا معانا.

زينة: الجمهور بيدعي للفنانين

واستكملت زينة: أنا شوفت جنازات الفنانين الجمهور العادي بيمشوا فيها، وكفاية أن لو أسرة مات فيها حد الحد ده يدعوا له الأسرة فقط لكن لو فنان ناس بتحبه هتلاقي ناس كتير بتدعي له خاصة لو فنان متفاني في عمله، لأن فيه طفرات من الفنانين زي فنان يكون مصدق أوي وبيعمل حبه بصدق وتفاني ومش بياخد غير حب الناس.

زينة: ممكن أعيش ببجامة عشان أوفي التزماتي لولادي

كما تحدثت زينة عن مسئوليتها تجاه أولادها وقالت: قبل وجود أولادي كنت بشتغل عشان أشتري جزمة أو شنطة ومكنش عندي أي مسؤوليات، ودلوقتي أولادي أولوية عندي، وممكن أعيش ببيجامة أو ترنج بس أوفي بكل التزاماتي تجاههم.

تصريحات زينة

وفي اللقاء ذاته، كشفت الفنانة زينة معاناتها مع أولادها التوأم وقالت زينة: متعبين جدا خاصة وقت عياهم لأنهم بيمرضوا الاتنين مع بعض، ودلوقتي كبروا وبقى عندهم 9 سنين وطول النهار خناقات ولو اتدخلت مع حد فيهم التاني بيزعقلي.

وعن طريقة تربية أبنائها قالت زينة: “أنا عصرية جدا في تربية أولادي لما تحضتني ابنك أو بنتك مش هيدوروا على حضن برة، ولازم يبقى سره معاكي انت”.

وأضافت: أمي بترعبني لحد دلوقتي عشان كانت بتضربني وأنا صغيرة دلوقتي بقيت بخاف على زعلها ومبحبش اسيبها زعلانة لأن زعلها وحش، وأنا بعمل الحلقة دلوقتي خايفة أقول حاجة تزعلها، وكنت بخاف من مامتي فكنت بروح لأصحابي وأهل أصحابي فاتضللت.